酷愛電影

我以前只係鐘意睇電影,但係隨著我係9年前讀過史sir o既電影課程就真係愛上了舊電影,比起宜家花巧o既電影,舊電影真係好有戲味

萍水相逢明天可能你會忘記呢個blog了

Moon

網誌分類：電影 |

網誌日期：2009-11-06 23:39

一個係月球發生o既故事,成套戲只係得一個角色,角色o既處境同《Cast Away》o既Tom Hanks係完全地相同,只不過Cast Away中Tom Hanks係非自願地留係荒島之中,而係呢一套片中o既呢一位人兄就係絕對地自願。當劇情一路推進o既時候係呢一位人兄o既腦海之中不斷出現幻象,咦,係《Solaris》黎嫁喎。之後故事又慢慢地去揭露電影底牌o既時候,又發覺之前兩套電影都只係電影o既包裝,《Moon》根本就係一套《The Island》,只不過呢一套係慳水慳力版。《The Island》拍左成一億二千六百萬美金,呢一套戲就只係要五百萬美金,但係我覺得呢一套好睇好多,有時金錢係堆砌唔到一套出色電影,一套好電影只係靠導演o既功力同一個好劇本就已經足夠,d演員好唔好都可以比導演搓圓撳扁,都屬於其次,仲要呢一套戲得一個角色,導演同編劇就更加孤立無援,稍一不慎就好容易見底。

係未來o既時空,人類已經發現左一種絕對清潔o既能源,就要係月球開採HE3運返地球以作供應能源之用。而片中o既唯一一位角色Sam就係月球負責開採HE3 o既工作人員,由於大部份o既工序都已經係電腦化,所以係一個開採基地,就只有一位人兄做一d手動o既工序,大家可以諗到佢有幾寂寞,同佢相對o既只有一部機械助手Gerty,同住係地球o既親人溝通就只有互send一d預錄o既影片。據公司所講,係因為傳送資料o既衛星壞鬼左,維修呢一個衛星o既事宜又唔係公司最急切做o既事項,所以遲遲未能恢復,此刻o既孤獨就等如《Cast Away》o既Tom Hanks。

Sam同公司簽左三年約,係電影開始o既時候,佢o既合約只係淨番2個星期,唔知對於就黎可以番去腳踏實地開心過渡,不時產生幻覺,見到一位女孩係太空站之中,同係夢中夢見別離已久o既老婆大人Tess,仲發生肉體上o既關係,見出Sam抑壓多時o既性慾已經佔據左Sam o既腦袋,此刻o既幻想就有如《Solaris》o既Donatas Banionis。

當Sam o既腦袋充滿住幻覺o既時候,係工作之上亦受到影響,係執行一次任務o既時候將架登月車撞落收集HE3 o既harvaster度。不過鏡頭一轉之下,Sam已經係太空站o既醫務室之中。之後,公司決定暫停Sam o既工作,要佢留守係太空站之中,公司就派出一隊拯救隊去收拾殘局。但係令到Sam萌生起懷疑之心o既係佢偷聽得到Gerty同公司高層o既live chat,明明話個衛星壞鬼左嫁,點解Gerty可以access到o既?係懷疑之時,Sam夾計搵機會出去事發現場,發現一位同佢長相一模一樣又身受重傷o既人,仲帶左佢番套空站o既醫療室,等佢慢慢復原,就係呢個時候同一個太空站之中有兩位Sam,二人o既相處起初都有好大o既問題,皆因二人o既性格同體格有所分別,(以下我叫受傷o既為大Sam,另一位就係細Sam)大Sam身體虛弱,心態亦都變得消極,細Sam體格比大Sam好,而佢就相對地上積極,二個人剛剛好係一凹一凸。細Sam負責諗下公司o既陰謀,佢拋出o既建議就得到大Sam o既細心分析同細心觀察,最終將公司o既大陰謀揭發。公司當為佢做野o既人只係工具,全部都係複製番黎,每當三年之約一滿,個位人兄就會拎去消滅,公司再叫醒另一位複製人之後再注入前者o既記憶去替代。此時對個間公司o既可惡感就有如對《The Island》o既Merrick Biotech。

去到最後壞人梗係不得善終啦,不過成套戲當中o既好人除左係大Sam之外,就係Gerty,呢一位人兄真係好唔話得,佢絕對唔係100%服從公司o既指令,反而會對Sam更加關切,其實作為一個機械人,理應無咩情感o既原素。但係存在係佢當中o既感情原素竟然比個d公司高層為高,都係一個字講晒,錢。錢真係萬惡之首,個兩位講得出咁無人性說話o既高層Thompson同Overmeyers真係慚唔慚愧嫁?

另一個我想講o既課題就係呢一d複製人o既生存究竟係為何?呢一個咁哲學性o既課題係電影之中都有滲少少出黎。尤其當兩個複製人同場出現,又或者大家各自睇番家人錄影片段方面,佢地兩個人除左係外表之上相同(其實係外表相同都唔係咩罕奇o既事情,雙胞胎都一樣係外表相同),但係最弔詭o既就係大家擁有同樣o既回憶,但係呢一d回憶係人工注入,並唔係由自己o既經歷所累積。而一個人o既定位同身份都係由呢一d回憶同經歷所組成,換轉黎講,佢地係一個無身份同無定位o既人,真係一件好痛苦o既事情,但係好折磨o既就係呢一d唔係佢o既回憶將會縈撓不散,如影隨形。

講左咁耐無論係背景,故事當中都滲有大量o既孤獨同冷漠o既場口,咁當然係呢個不毛之地就梗係充斥住呢d情況啦,但係成套片我最欣賞反而係片中o既溫情,由大細Sam到Gerty,大Sam對d植物等等。其實呢一套戲係瀰漫住一片好濃厚o既感情在其中,而導演係描寫呢一d情o既時候下左不少o既心機,無論係細緻到道具o既運用之上(當中值得一讚o既就係Gerty個一個螢光幕仔哈哈笑o既模樣會相對不同環境甚或至係佢觀察到Sam o既心情而改變),去到大細Sam相處時二人關係o既轉變,都拍得一絲不苟,有條不紊,呢一套片真係絕對唔似係導演o既首作,第一套已經咁厲害,遲下o既仲可以去到咩境界呢?

引用(0)

知多一點：

共0個回應

新增回應