Michael Jackson's 《This it it》

雖然從來都唔係 Michael Jackson 既粉絲, 但係佢 d 歌陪住我地呢代既人成長, 點都要去睇下佢最後既演出.....懷住沉重既心情一個人去睇 This is it, 有 d 去追思會既感覺, 甚至如林海峰所講, 再白 d 既: 去瞻仰遺容....

一開場好快已經有一個催淚位, 我仲食緊我既 Triple O combo 所以唔得閒喊住.... 呢個 MJ o係記者招待會宣佈真係最後一次唱, "This is it!" 既片段相信會名留青史....

111 分鐘入面 8 成都係 MJ 演唱首本名曲既綵排片段, 其餘係 MJ 同工作人員製作演唱會既花絮.... 初初 expect 每首都係零零碎碎, 同埋會好似死亡習作咁畫面震滕滕, 但原來錄得都好完整好高質素, 每首歌會由幾次唔同既綵排剪出黎, 多角度拍攝, 可觀性相當高.... 除左衫, 髮型化妝同舞台之外, 差唔多已經同真既 concert 無分別... 

《Smooth Criminal》crossover 黑白片入面既 Rita Hayworth 同堪富利保加..... o係戲院一路睇戲一路跟住 un 都好似未試過.... 舞台上既 MJ 真係好有吸引力, 唔怪得知 d 影碟舖門口成日有一班人聚集o係度睇 MJ 演唱會....

由原本 10 個人 CG 到千軍萬馬一齊操既 《They Don't Care about Us》.... 型~

主角係 MJ, 因此其他工作人員亦相對地模糊, 不過靚女係有著數, 全片只有特別介紹和音既爆炸頭女仔同彈 《Beat it》結他 solo既呢位金髮靚女 Orianthi.... 

片段中 MJ 不斷強調佢要留力, 唔可以用盡把聲住, 但係無論跳舞同唱歌, 一樣覺得佢同真正表演一樣咁認真, 仲不斷丙 d 音樂人同監製, 要佢地做好 d.... 一個對音樂同舞台咁有熱誠又咁有天份既人咁早就離開左, 的確令人唏噓.... 睇完呢套戲, 之前所有唔好既傳聞就抹左佢, 大家心裡留下一個美好一面既 MJ 吧~

p.s.  之前睇影評已經知道字幕之後仲有野睇唔好走住, 仲話個個觀眾都唔肯走, 最尾好多人自發拍手致敬, 所以我都準備晒會拍手.... 不過我果場既觀眾, 就算字幕都打埋出黎話「敬請留步」, 都係一見 roller 即走, 臨尾亦係一片死寂,  0 拍手 Orz