戲院內......討厭的人!

  是日,本來只打算隱居家中,見肚餓未食野,唯有死出去M記搵野食,臨行前諗住打比佳哥叫佢出黎一齊食,又搵唔到佢。食食下佢又打番比我,原來返工冇聽到電話,仲問我打唔打波,於是約埋打左陣籃球。其間佢又提議晚上睇戲,我話有咩戲好睇,佢話打左去戲院問今晚有''低清老翻王''上,我話:''呢套嘢唔係比你條女mark左你要一齊睇嘅咩?'' 佢就好豪氣咁話:''挑,女之嘛,我ban左佢啦,而家我同你睇!!'' 哈,因住比條女扭耳仔呀!

  沖埋涼換好衫同食埋晚飯之後,就啱啱好夠鐘入場。見仲有d時間,諗住一齊去埋個toilet先,點知原來係一人廁所,唯有我入去先。出到黎又唔見佢,我諗佢可能入咗場先,於是就入去啦。點知尚未坐低,就發覺後一排隔兩個位有一對赤腳伸左出黎,原來係一個30幾歲到嘅女人,咁我緊係唔坐佢前面個位啦!(因為呢套戲少人入場,所以坐邊其實無咩所謂。)呢個時候佳哥先至出現,佢話打電話搵我唔到,我都話有打比佢,不過收唔到。佢話做咩唔坐中間,佢買左中間位,我話:''你睇下先啦,後面條友差咗對腳出黎呀!''(都唔算大聲,但相信足以令佢聽到我講乜) 跟住佳哥唯有不悅地坐咗隔離個位。

  一開頭,戲院又唔生性,聲量少仲近乎冇咁滯,已經想高聲呼叫上面大聲d,過左5分鐘先至變番原來大聲,但我已經忍唔住要高舉中指抗議。睇戲途中,個女人同佢老公又不停''之之噚'',我哋已經覺得好煩,有好幾次我已經差唔多要擰轉頭吊9佢哋,但都忍咗落黎。跟住套戲開始有笑位,所以我再無暇理會佢兩個。眨下眼一個鐘到,呢個時候背後傳黎一陣陣嘅鼻鼾聲,我已經心知不妙,不過仍然冇再理會。直至套戲完咗,開哂燈,我哋擰番轉頭望吓,點知原來個女人同佢老公攬住一齊訓著咗,個女人仲較低哂d 扶手將幾個座位當床打橫瞓,更神奇嘅係戲院已經開哂燈而佢哋兩個都仲未知醒,好一對令人羨慕嘅''神經怨侶''喔!! 其他有路過嘅觀眾見到佢哋嘅醜態都只能直搖頭又或者恥笑。唉!! ''假係自己丟'',好心兩位人士連電影嘅基本欣賞禮貌都唔識就唔好出黎獻世啦!!

唉,返屋企瞓啦,老友!!