面對再次失業嘅內心世界

今日，Pamela已經開口問我係咪已經知道唔續約，其實好多謝你地關心我，我早已經心裏有數，所以冇太大感覺，我更明白係一間外資公司始終對學歷要求係高，而我只係呢行初哥，仲要冇去讀過，被淘汰係好自然嘅事，如你們一樣，只嘆公司對supporting staff唔重視。

閒談間，玲姐以為我搬左位轉左full time，我話俾佢知我走嫁喇！跟住佢話估唔到，仲講話覺得我好可愛好得意，day 1已經好鍾意我，仲問我幾多歲，點知佢好嚇人地話初初見我以為我得21、22，估唔到我都做左好幾年嘢咁話，攪到我鬼咁開心添！而今日都同CADD嗰邊熟嗰一兩個透露我走，佢地都俾我一個我好接受嘅反應，哈~估唔到會識到你地呀！其實你地真係好好人呀！

今日番學教training，一項我做左HR咁耐都唔會有機會掂嘅嘢，因為都幾專，但佢教完我都唔明，都係嗰句~呢個tutor好唔掂，但奈何得HKMA有HRM嘅Cert.讀，今日Pamela有提過話iHRM都有，但我話俾佢知個價錢，Cert. of Employment Ordiance都萬一，而HRM得foundation都係萬一，好唔抵呀！但今日隔黎坐左個古怪男，間中自言自語又話呢樣唔識嗰樣唔識，但我冇睬佢，放學我見等lift等得耐咪行樓梯，又跟住人，之後我一個不留神下即刻一支箭過左馬路，好彩冇再跟，好討厭~已經好唔妥佢今日坐左我隔黎，本來恒常有個都係靜嘅女仔坐我隔黎，今日俾佢霸左，估唔到仲有人真係唸住讀course追女仔。

好喇好喇！又到我發洩嘅時候喇！仲有道歉啟示嘅......Jacky為左我嘅經濟狀況太緊張，所以成日提我搵工呀！又話唔想我去到最差嗰步等等，其實我同佢一齊咁耐我好少會同佢有爭拗，因為我地兩個都遷就得到對方，但係今次我真係好炆，所以bilibala咁嘈佢，或者我嘅情緒都未回復到一定穩定水平，但對於呢類咁偏激嘅「鼓勵」真係吃不消，仲感到佢喺度俾緊壓力我。其實每次我冇嘢做佢都會咁，我都記得有同佢為左佢太壓逼嘅鼓勵而發過佢脾氣，但我真係好想講，搵工係主動，但搵到工係被動，佢仍然口講話唔係俾壓力我，但係佢好積極咁話俾我知佢見到咩工啱我，原意係好，但係佢有時嘅態度係令我覺得佢質疑緊我有冇搵工。

其實我成日擺出滿不在乎嘅樣子係因為我係感到壓力，為左減輕呢種感覺我先會做到好似滿不在乎，為嘅係我有全世界逼我嘅感覺都好，但我一定唔可以逼自己。回想喺仁濟出黎時都係不停搵工，壓力好大好大，病係越黎越差，點解嗰時你會識得叫我放鬆，而家又做埋逼我嗰個呢？唔使講都明白嘅道理，冇嘢做經濟係會成問題，但成日提住嘅感覺唔係鼓勵而係壓逼，由我day1估到個結果，我心裏面由難受變為平淡都要時間消化，而我係好堅強咁一個人去面對左現實，消化左個結果先再同你講，嗰一刻點解我話唔在乎係因為我面對得到，仲要係獨力面對得到，呢種雀躍感已經令我嘅難受消除。

但係今次你嘅緊張令到我好快已經出現壓力，仲要係我明明由day1開始好努力去搵工變成我好似咩都冇做過嘅感覺，難受難受也！點解呢一刻你都變得咁唔理智呢？經濟問題會出現並唔係一時三刻先知嘅事，但係你不停去提我會改變事實嗎？會令到有份工喺天上面跌落黎嗎？會突然中左六合彩而經濟壓力消失嗎？答案係唔會。幸好，我呢一刻仲有理智，明白你緊張我，我都要講對唔住，因為咁我發脾氣，但我好想趁我仲有理智時同你講，呢一刻我可以理解你嘅出發點，但當我失去理智時我係唔會明白，我更加唔想我失去理智時會變相埋怨你，因為我真係好唔想破壞我地關係。

雖然一齊左年半有多，但我地都經歷過唔少事情，但今次點解去到呢個關口你已經打定輸數？我嘅感受係你唔相信我，因為我默默去處理自己事情下你會抱住「勸告」嘅態度去叫我做我其實已經做緊嘅嘢。你知道嗎？今次我對你呢種對我不信任嘅態度感到生氣，感受到挫敗感，因為我開始適應社會生活，去面對種種，已經係好大勇氣，從中我仲得到成功感，但你嘅不自覺嘅態度與表達令到我好混亂，究竟我點做先啱？但係我做嘅嘢都係你suggestions之內，咁即係話你唔信任我，對我仍然存疑。

我承認，過去我真係會因為失業太耐而沮喪，咩都唔想做、唔想理，但你當時又會理解到係Mr. Depression作怪？但今次呢？即將失業，我已經開始處理我嘅事情，你卻將Mr. Deperession推黎我身邊，你知嗎？壓力係佢阿媽，佢阿媽會做紅娘將我同佢縛埋一齊，我真係好唔想為左呢樣嘢同你有爭拗，但係我每次叫你唔好俾壓力我你就會更不期然俾我更大壓力，我知道，我經濟有問題你都會有壓力，但係你咁快打定輸數其實好影響我，每次你一講完我又要同自己講：「你都係緊張我姐，為左你我會更努力！」但你喺呢兩日裏面，一而再，再而三咁講，你知唔知我催眠自己唔係好叻，我開始唔想再講呢句說話，甚至已經感到好辛苦。

呢個星期，要適應新藥物，又要忍受side effects引起嘅不適，情緒真係好差，但我唔想你擔心，努力默默忍受，但係呢兩日嘅壓力令到我情緒「再下一成」，所以頭先已經開始發脾氣。我都要講番一句：「對唔住！」我好希望你明白，我對你百份之一百信任，相信你對我嘅安排，但我都請你信任我嘅自發性，我承認你識我咁耐我嘅自發性係好低，但係係同Mr. Depression有關，並唔係我由心所做出黎，相信我，俾時間我，趁我仍然撐得住、仍然係理性，你要明白失業我比你更害怕，一來係經濟，二來對我情緒好大影響，我真係好想好想為你生BB，但我一日仲病我更本做唔到，我都想控制到個病，其實失業我一啲都唔好過。

如果我做到唔開心，大家為我擔心，事情都未必會改變得到，點解唔可以用輕鬆嘅心情去面對？何況呢件事無論邊個都好，唔會有人比我更緊張，但我要努力面對逆境，因為咁先可以證明到我喺呢幾年嘅治療並唔係冇得著，所以先唔想大家擔心，俾你地見到我輕鬆嘅一面。作為我最親嘅你，好希望你明白，亦希望你支持我，或者我做嘅決定係愚蠢或者錯，但係我都要喺失敗中學習，唔好因為我嘅病令到你太保護我，俾我最好、最舒適嘅路，因為我相信我總有一日會有能力去獨力面對失敗。

我好希望呢一刻我仲用理智去同你講，而唔希望有一刻我我失去理智繼而傷害到大家感情。