買新鞋鞋

今朝見到一件好得意嘅事，我見到一隻貓一直跟住個婆婆，婆婆行佢又行，婆婆停佢又停，好得意，之後同媽媽講時媽媽話呢隻貓係識送啲婆婆番屋，一送到去大廈大堂佢會走番轉頭，解佢咁錫啲婆婆嘅？

今日真係無心戀戰，今日完全都唔知自己喺度做咩~~不過天氣凍左所以咳得犀利左，嗚~辛苦啊！唉~成日都喺度攪自己嘢，不過我又真係唔係太多嘢做嘅。但係離開嘅日子越近，我發現自己越唔捨得同事們，雖然呢度真係唔值得留，同事講得啱，就算走左都唔會係可惜，我地指係工作上，但係同事們嘅關愛真係令我感到好窩心，大家忙裏總會偷閒講笑，即使多忙都會互相幫助，氣氛真係好好，但係如果喺度真係冇發展，始於我喺HR年資仲淺，應該試多啲新嘢，呢度只會令人退步，見到有同事做番轉頭，感覺都怪怪~

一直hea到放工，一直等話想去買鞋，因為佢地好忙呀！Pam Pam最高走，之後到我，而我同阿Pam喺washroom相遇，之後Endora都出現，但Alice竟然仲有嘢要等老闆簽，所以我地落左商場等佢，佢做完嘢打黎時以為我地走左，我即刻話快啲落黎呀！我地丟緊你！哈~一行4人去左中環買鞋，間嘢啲鞋都唔錯，因為係日本鞋，幾舒服，我忍唔住手買左兩對，一對高高地，即拎，一對係貓貓妹仔鞋，但係冇貨要訂番黎，但係唔貴，係原價嘅3-4折，呵~~Pam Pam唔執輸，都因為有一對勁平又好睇而買多左對，Endora揀左好耐，因為佢心大心細，見到靚但係啲料又唔係好啱佢，最忍得係Alice，竟然係買左一對咋~佢話等兩個禮拜後等我地拎黎鞋時買新款喎！

Shop Name:MOMOKII

Adress: 中環士丹利街26號陸羽大廈604室 (陸羽茶室樓上)

Office Hour: 11am-8pm (Mon-Sat)

                    11am-6pm(Sun & Public Holidays)

買完鞋我地去左馬會行大運，之後本來我同Endora&阿Pam食飯，但最後阿Pam唔要我地，得番我同Endora撐枱腳，傾左啲估唔到會傾嘅嘢，食左碗好美味嘅粥，仲有好炸嘅鯪魚球，而碟菜仍然係啲葉唔見晒去左我個肚。之後我地行番出去大街各目搭車番屋企，但因為中環我唔熟，所以行左好耐，我唸我如果同Endora同方向行會近啲有個巴士站。