擔心

唉.....昨日無端端摸到謙謙右邊頭頂軟林林，好似有D啫喱狀野起頭皮下面，都幾大範圍，於是昨晚帶佢去急症室，等咗好耐照咗X光，醫生話頭骨無事，但原因有好多，暫未確定，於是要星期五再去見醫生，唉.....等待係最痛苦嘅！都唔知係唔係撞親，但又唔見瘀哦！究竟點解呀？

由於擔心，縱使好疲倦都依然瞓得唔好，扭咗成個鐘先瞓著，今朝起身肩頸痛，又趕唔到班有位坐嘅火車，仲要等咗好耐巴士，企到我頭暈流冷汗，點知黎架滿坐巴士，幸有同事相伴企咗一個站後幫我叫人讓位，咁先好D，但係返到公司都仲係頭暈兼頭痛，脈搏高血壓低，休息咗半個鐘血壓正常D，但依然頭重重，都係決定回家休息，上車前嘔咗一次，回到家又衝入廁所嘔多次，唉.....超辛苦，見到謙謙精神過我，於是安心去瞓，依家瞓醒，食D白粥，無咁頭暈啦！不過仲係頭痛，周身酸痛，但忍唔住陪咗謙謙玩咗陣，之後又頂唔順，依家又要再瞓過！請大家為我倆祈禱哦！