我的週末

其實都已經係兩星期前嘅事，我喺星期六去咗Ocean Park，星期日就去咗Kitty Lab。

先講Ocean Park，其實我都有x年冇去過呢度，對上一次係讀緊u的時候，可能當時年少氣式盛兼唔衰得，竟然夠膽一個人坐海盜船嘅最後一行，嗰時我其實好驚，叫到顛咗，不過我啲同學以為我係扮投入，仲話我啲演技好勁，如果我嗰時真係扮嘅話，照計金像影后都應該有我份囉（當然係實力派唔係偶像派）。但係今次我一入場已經開始有啲驚，唔知係咪年紀大咗，個膽就細咗，就連坐吊車我都驚，最後我只係玩咗過山車，海盜船同跳樓機都只係遠觀，真係冇用，不過我都玩得好開心，我最鍾意就係海洋館同埋水母館。

至於Kitty Lab，一句講晒，搵笨！其實我都預咗裏面啲遊戲唔會太特別，只係用啲靚公仔吸引Kitty Fans，所以我只係諗住影啲靚相，我完全冇諗過裏面唔影得相，當然我都冇特登上去check佢啲regulations，因為我覺得呢啲場合冇理由唔比影相，結果我帶咗部500Ｄ去，當我拎部機出黎嘅時候，個工作人員話＂嘩！你都好揚喎。＂雖然我知道好多人都偷偷哋影，但係我係嗰種唔鍾意俾人話嘅人，與其影得咁辛苦就不如唔好影，好彩我啲飛唔使錢買，如果唔係都幾肉痛，不過裏面啲公仔真係幾靚。