西班牙奔牛節 (一)

0係新聞同旅遊節目睇得多西班牙0既奔牛節，估唔到人生裡面竟然可以親身0黎到北部0既小城龐普洛納（Pamplona）參加與牛狂奔。
 
奔牛節每年7月舉行，為期8日，每日朝早8點就舉行奔牛活動，成段路有900米長，以鬥牛場為終點，參加者唔使報名唔使俾錢，只要8點前去到跑道準備，亦都唔限由邊度起跑，我自知跑得慢，所以一早「偷步」，走去鬥牛場前100米0既地方開始。8點火炮聲一嚮，6 隻過千磅0既公牛同幾隻閹牛奪欄而出，我見身邊0既人起勢跑，未見牛蹤我都唔執輸跑住先，「Bull! Bull!」後面有把聲狂叫，我即刻拎轉頭望，原來那個男人整蠱我，嚇到我面容扭曲佢不知幾開心。點知再跑入鬥牛場後，0的人同牛真係跑到0黎，我即刻爬過圍欄去到安全區，好彩無俾牛撞到，因為真係有唔少人因為奔牛而死，事後諗多兩諗，愈諗愈驚，點解我當日會咁大膽落場跑0架？比笨豬跳同sky dive更恐怖呀，我諗一生人玩一次就夠。

成街0既人都著白衫白褲，頸帶紅巾，因為奔牛節原本是SanFermin節，紀念傳教士San Fermin被斬首殉教。

 
由巴塞隆納同馬德里都可以搭飛機、火車、巴士去龐普洛納，搭火車同巴士要五六個鐘。

 
跑道旁有雙重木欄，觀眾只可以坐在外圍木欄，中間一層由警察同救護人員作後支援，參加者跑唔掂可以即刻爬過欄走避。

呢兩位人兄一早搵定個安全位置，避開公牛，不過唔知點落番0黎呢?