我學六壬神功的日子 53

 其實真係好唔應該成日話妙公呢邊；平公果邊……

…續上回…

其實平公、妙公都係同一條法脈傳下，點解要搞出呢邊、果邊呢？小弟以為皆因兩位老人家都獨當一面，佢地兩師兄弟之間o既野，根本唔係好多人知，好多年前已經傳出話佢地唔妥，又呢樣又果樣，搞到雙方門生都唔妥大家，各有各擁戴。有 d 好學o既就唔理咁多，兩邊都學。最後就撈撈埋埋…

姑勿論地五雷是否來自文五雷，又或武五雷是否來自天五雷，總之有興趣學六壬神功o既善信朋友，選定師傅就一心一意去學，有唔明就問。師傅傳乜就學乜！每代宗師唔多唔少都會加 d、減 d 或改 d，真係唔好咁計較，一條咒唔同師傅唔同行法，邊個岩邊個錯？定個個都岩？諗到死果日都未必知。去問人咩？對方講真定講假又要諗餐死……真係多舊魚……

大家有心學六壬神功，唔好為五雷而學神功，有心有力、誠心誠意，到時祖師總有安排。試問各位過左五雷o既前輩師兄，係咪勁左好多？勁左 d 乜呢？小弟夠膽話而家好多弟子連大教法都未學好就過埋五雷，你問佢五雷點勁呀？睇佢點答你？

唔知而家 d 傳教師傅點講法？六壬門最高就係五雷？六壬法門最高就係三山？

大家睇完小弟呢幾篇吹水文章，大可問下各自師父，五雷究竟係乜？過五雷為乜？點解要過五雷？過左五雷又點？有乜野學？學左又點？有乜資格至學得五雷？然後再回應討論下！

…暫完…

以上全是自己當年的假設，大家請勿當真。

【以上文章內容，純屬虛構。如有雷同，實屬巧合！如有不滿，請勿見怪！】

【以上為原創文章，歡迎善意轉載宣揚，轉載請註明本網址。惡意盜用或借用，後果自負！是善是惡，神人可鑑！】