毅行者09

關于這次毅行, 其實有很多野想講, 可能30個鐘都講唔曬, 而家就先簡單地描述下個過程啦!

上星期一直有點傷風同喉嚨不適, 以為毅行當日可以及時好返, 好惜呢個病比較長手尾, 被迫要帶病上陣!

起步時風和日麗, 見到唔少人士都只穿心短褲出發, 而我們四人均穿上長衫, 再加件t-shirt, 真的弱了一點.  上次練習時, 我們是行下jog行的; 不過, 由於中哥有傷在身, 完全巳走不動, 故只能慢行. 到光明頂後, 我開始忍不住腳, 慢jog落斜, 到東霸前已趕及醉消閒隊, 于是拍住他們行了一小段. 到東霸尾, 用了1小時29分! 在此等了一會, 開始覺得涷, 無奈這個位置一個擋風位都無, 被迫硬食強風10多分鐘, 真係唔病都吹到病呀!

等齊隊員繼續向西灣山進發, 這次輪到我負責殿後, 跟中哥保持1, 2步間的距離. 一直上到西灣山頂, 都還勉強頂得住寒風, 但到山頂後, 風勢加強, 我開始打冷震; 這時剛好隊長慢了下來, 便乘機快行離去, 讓隊長照顧中哥, 但想不到呢個決定, 後來卻註成大錯!

落西灣山這段路, 非常擠擁, 我不好意思不斷扒頭, 唯有快慢腳地行, 但每當一慢行時, 便感到寒風剌骨, 十分難受, 後來唔再禮讓, 逢人過人, 直奔check point 1. 到達時二話不說, 走到旁邊士多叫了一碗麵吃, 身體才溫暖下來, 這一刻, 深深體會了飢寒交迫的滋味! 吃完碗麵不久, 傳來惡耗, 隊長因身體不適, 被逼要退出, 想深一層, 如果之前我不是把中哥交比佢, 或者佢就唔會有事, 最多有事果個係我啫!

見到隊長出事, 為了唔想成為第二個退出者, check pt 1 至 check pt2選擇了快走, 但到咸田灣時, 唔熟路, 風刮得很大, 又有沙吹了入眼, 一度在沙灘中迷失了方向, 找不到前路, 左走右走了一會, 終於發現了其他毅行者, 才能跟着他們, 離開呢個迷幻沙灘! 到赤徑段, 雖已入黑, 但實在太涷, 要發力狂奔, 先可以保持體溫, 最後用了1:10到chk pt2.

到chk2時, 找不到support點, 在chk pt 附近徘徊了一會, 身體又開始發冷, 于是很辛苦地山從背包取出電話, 找大隊長支援; 見到消閒加油站, 火速穿上風褸, 但仍抗不住寒風, 邊食飯邊發冷, 後來大隊長及消閒夫婦駛出人肉擋風機, 感覺才好一些!

第三段又輪到我陪中哥行,  但一上到山腰, 風已刮得非常大,  大到令人有站不穩的感覺, 好彩中哥上山路段不算太慢, 我不用等他太久, 加上在chk pt2時已着埋隊長件長tee, 勉強可以頂得住寒風. 在水浪窩有馬王兄等人熱情招待, 一時間都忘記寒冷!


第四段上基維爾營, 仍由我拍住中哥一齊行, 但當行到中後段萬里長城的時候, 狂風不斷勁吹, 不僅吹動人的身軀, 連人決心都給吹散; 正當中哥很守規舉跟着人龍前進的時候, 我受不住風寒, 自私地拋下隊友, 穿插在人群中, 急步前進, 原來我都係一個大難臨頭各自飛的人!

去到基維爾營, 好高興仍然見到大隊長, 可惜之前追加的蕃薯糖水, 要留給中哥. 見有時間, 沖了 一個熱水涼, 感覺好了一點, 但仍然有發冷的感覺, 到這一刻, 知道若是繼續慢行捱涷的話, 我一定捱不到天光, 就涷死在路邊, 于是在中哥準備歎隻雞肶架時候, 我好認真地同佢講, 之後架路, 我唔可以再陪佢慢行了! 我諗當時佢係心中一定會怪我無義氣, 掉低佢唔理, 不過如果繼續慢行, 真係佢唔quit我都quit, 或者我同佢之間的交情, 還未到生死相許的地步!

從基維爾營到畢架山, 行下jog下, 一點都不累, 由於有一定速度, 身體亦勉強抵受得住
寒冷; 到達後, 立刻找來一張一毛毯, 席地而睡, 雖然已包得實一實, 但仍有寒風吹入被窩中, 完全睡不着, 個多鐘頭後中哥同franc franc便到來, 寒暄一會我便與franc franc先行離去, 直奔chk pt6. 在全程保持輕快步伐下, 轉眼間又可以進入醫療站小睡片刻, 呢次睡在帆布床上,  舒服很多, 終於睡着了, 還發了一個好夢......可惜好快便被franc franc打碎了!

之後, 由franc franc帶領下, 慢jog至燒烤埸, 在support team的美女們熱情款待下, 大家久久都願離去, 早餐食完一個又一個,  乾柴烈火下, 身體感覺已恢復過來,  于是決定快走第7 段, 用了1:33便到達鉛礦坳, 當然老規舉, 取張毯在草地上睡一會, 一小時後中哥來到時, 我便獨自向第8段進發. 在鉛礦坳時, 只顧睡覺, 什麼東西都無吃, 亦沒有飲大會的飲品, 因為心想: 在荃錦坳有豐富美食等着我, 又何在此食麵包呢?  但急行上到大石堆時, 突然手腳乏力, 全身軟了下來, 于是立刻坐下, 在背包中搵jel食, 可惜搵極都搵唔到, 唯有厚着面皮, 向路過的毅行者, 乞求一包jel.  最好有好心人送上朱古力jel一包, 十分美味, 休息了一會, 便在山頂上快行, 不久見到有一位外籍人士迎面跑過來, 十分寫意的樣子,  于是我亦忍不住腳, 走起上來,  在山脊的草地上奔走, 十分暢快, 比起平日練習的石屎路, 真係舒服好多,  好快又去到荃錦坳了, 如常, 食完野後便小睡片刻!

第9段又同franc franc拍跳, 看來他大把在手, 我亦跟得有點吃力, 差點比佢扯爆! 去到chk pt9, 又入醫療站休息, 其間見到有一參賽者因發燒的關係, 要退出, 感覺十分可惜; 後來中哥同隊長來到時, 眼見中哥面無表情, 意志消沉, 開始擔心, 于是我們決定最後一段四人同行, 就算中哥真係行不動, 我同franc franc應有能力, 抬佢返終點!



最後一段一直都行得唔錯, 頭幾k都無慢下來的跡象, 但中段當隊長墮後時, 中哥亦慢了起來, 于是我叫隊長要走在中哥前面, 給他一個跟隨的目標, 在這段頗悶的環塘路段, 我一直聽mp3, 藉着音樂解悶; 在見到大棠渡假村時, 我望向天上的星星, mp3正在播放着"今夜, 我看見, 手牽着手在往前; 今夜我聽見, 心連着心......."  即時心中有點感覺, 在這個夜晚, 我們四人終於可以一同回到終點了!

















CP1: 3:29:38

CP2: 1:10:44

CP3: 3:33:14 (rest:1:03)

CP4: 4'21:53

CP5: 1:37:42 (rest:1:19)

CP6-CP7: 2:15:30 (rest:45'10)

CP8: 1:36

CP9: 4:58

CP10: ???

期間麥徑7段: 1:33

        麥徑8段: 1:36

全程訓左5次, 合共5小時左右!

後記:

原本諗住當毅行者是一次長課活動, 玩完抖一兩日, 便可投入常規的訓練. 不過, 想不到呢次唔係拉傷肌肉, 拗傷腳, 而係涷親, 終於發了跑步以來第一次大病!

星期日睡醒已有點不適, 但不已為然, 還打算落街吃午飯後, 便如常上堂; 不過, 在茶餐廳等候快餐的時候, 越等越唔妥, 心中不斷埋怨點解快餐還要等這麼久, 等到有點昏腦脹, 當那碟粉上台時, 便狼吞虎宴, 但吃了一半, 卻吃不下了, 唔係因為飽, 而係胃口已消失, 于是決定走堂, 打道回家.  回家後探熱, 竟然是100度, 立刻休息. 幾小時後起床, 再探熱, 燒到102度以上, 便沖個溫水涼及用冰pad降溫, 稍為精神後便搵野食; 見家中有些已發硬的方包, 二話不說塗上牛油果jam, 繼續毅行餐, 雖然難食, 但仍想食多件; 但細心搽醬時, 竟然發現麵包上有霉點, 唉, 真折墮, 不禁嘆一句: 早知今日, 何必當初呢!

經過三日的反思, 其實有點後悔參加這次毅行者. 首先, 一開始就唔知道為嘜參加; 別人可能為挑戰自我, 為理想, 為團體; 但我一樣都無, 老實說, 用25個鐘行100里, 基本上我係可以完全唔練, 都可以輕鬆地行完, 所以完成這100公里, 跟用5小時完成一個全馬, 感覺無什麼大分別, 對自己的體能同意志, 絕對稱不上一種挑戰!

而我選擇參加除了為勢所迫之外, 主要原因就係把毅行者作為一次聯誼的活動, 跟大家開開心心玩一次; 不過後來發覺support隊那邊仲好玩,  早知做support好過!

感想:

這幾天又病又忙, 雖然睇完其他人的毅行心聲後, 心中若有所感, 不過始終沒有機會把它寫下來.

我一向知道自己是一頗自我的人, 唔係好喜歡聽從別人的意見; 不過在人群面前, 我都會裝作大方, 跟別人妥協. 最初我以為我們四個男人, 要25個鐘行完, 應該絕無難度, 故一直都諗住唔駛有什麼隊形, 各隊員鐘意點行就點行, 準時到check point集合便可. 不過到後來聽聞某隊員心感壓力, 不斷加操都覺不足,  于是有人建議不如三隊從新組隊, 讓某君可以輕鬆一點, 因為始終我地都係消閒者, 玩下啫, 何必太緊張? 不過後來因某些原因唔成事, 故我們唯有原班人馬應戰!

比賽前不久, 我們終於可以第一次, 亦係唯一一次全隊一齊練習, 起初諗住操7-10段; 可惜某人說已操過果幾段, 如果大家要操果幾段就唔駛預佢了. 由於呢次練習目標是要夾pacing, 練隊形, 唔係要熟路, 所以我和隊長便決定改操1-3段遷就佢, 但對方竟然話可以到, 但要遊山玩水, "大佬, 遊山玩水就應該約馬王, 我地想夾pacing呀?"  呢次操練雖然最後都練唔到d嘜,  不過起碼都讓我知道大家對於呢次毅行有何看法.

臨近比賽, 某隊員因傷想退出,  其實我心底不但無覺可惜,  反而覺得如果有強者出山取代佢, 對整隊都會有所得益; 就算強者唔玩, 加一返個靚女, 大家都會開心好多.唔知幸運還是不幸地, 某人又及時康復, 可以如期出賽!

起步時以為會跟上次練習一樣行法, 即上斜平路慢行, 落斜慢jog; 但當大家打算慢jog時,  點知某人原來一步都jog唔到, 一jog就痛, "點樣唔早出聲, 等我着多兩件衫先呀?" 不過, 呢個時候怨都無用, 鬼叫大家係隊友, 你行唔郁, 逼你都無用. 之後點行, 唯有靠隊長臨場發揮, 可惜隊長又無嘜特別指示,, 隊員唯有自由發揮, 鍾意點行就點行!

要陪一個男人慢行,  其實好似被安排一個男技師按摩一樣, 十分無癮, 有得揀, 梗係要搵個女架啦!  不過, 但既然被安排了, 亦要無奈地接受, 慢慢行, 捱下涷, 捱下悶, 其實亦無什麼大不了.   不過, 當某人向我投訴另一隊友時, 我就覺得有問題! 人家按目標時間而行, 係無錯的,  錯架係我地, 行得慢而唔達標;  我地又點可以掉返轉頭怪對方呢?  最後因為唔想再聽呢d說話, 我選擇左自己一個人行, 因為我怕行得悶的時候, 或者我都會忍唔住講出一些埋怨隊友的話來!

呢篇感想, 純粹係將自己的心路歷程寫下來, 雖然會得罪人, 但我實在忍唔住, 我唔想做一個表面對人讚好, 內心卻有諸多不滿的人!