慶生@804

2009年8月4日  大雨, 8號風球

32年前的8月4日, 同樣都是下著大雨. 懷著我的媽媽在夜晚作動, 爸爸和她趕忙地從旺角趕到銅鑼灣的聖保祿醫院. 不知過了多少時間, 我終於從媽媽的肚中爬了出來.媽媽常對我說生我時很辛苦. 我一出來後她便痛得暈了.

可能係因為咁, 我註定係一個"雨人". 差不多每年生日都係落雨, 仲要係好大嗰隻. 今年仲要打埋風. Ai, 好彩我咁怕熱無諗過去戶外, 如果唔係都幾掃興!

咁大雨, 都係食吓飯, hea吓咁過啦. 食咩好呢, 一係去啲未去過嘅都好. 不過, 話晒生日, 如果去咗間覺得唔好食咪幣. 都係穩陣啲, 新嘢留返平時去好啲.

稻菊係一間從來都無令我失望過嘅餐廳. 而且, 對我同小志而言, 亦都係一間有回憶嘅餐廳. 話說我第1次嚟嘅時候應該係6-7年前嘅生日, 當時我地叫一件厚燒牛肉, 個captain突然問我地鍾唔鍾意多雪花, 我地話鍾意. 咁佢就同我地講今日有件A5嘅日本和牛, 問我地有無興趣試吓. 我地諗都唔諗就答: 好.

件牛一嚟到, 好香; 一放入口, 即溶. 一啲都唔似食緊牛, 好好好味.  當我地食完之後, 我同小志講: 你估呢件幾多錢呢 ? 佢話唔知. Menu上最貴嗰件$7xx, 呢件應該$1,500倒啦. 咁我就問返頭先個captain. 跟住佢答我, 呢件………. $2,800!!!

嗰一吓, 我真係好肉赤, 邊個俾錢我都係一樣好好好肉赤. 連埋加一件牛要over $3,000!!!! 我仲記得嗰一吓我好想喊, 不過認住咗. 埋完單一出門口, 我真係頂唔順喇, 係咁喊係咁喊, 小志不停同我講: 咁都係貴啲啫, 又唔係食完之後無飯開, 唔駛喊到咁wor. 咁我都知, 不過真係好肉赤, 同埋係unexpected, 所以我控制唔倒自己. 落到樓下上的士, 再返到酒店房, 我都不停喊喊喊. 小志直情話佢死咗可能我都無喊得咁緊要. 唔知過咗幾耐, 我先收倒聲jar. 呢個真係一個最難忘嘅生日, 直到依家小志有時都會笑我ga. 當時我仲話過以後都唔嚟tim!

後來, 梗係不了了之啦, 啲嘢咁好食, 點唔嚟呀?? Haha, 女人, 都係善忘!

好, 講返呢餐先. 雖然打風, 但都有8成full wor. 原因唔駛講, 梗係因為好食啦. 呢間同IFC嗰間compare, 我同小志都覺得呢間好食啲.

我唔食生嘢, 所以叫個凍豆腐食吓先. 好滑!

嚟得梗係要食天婦羅啦. 第1 round我地叫咗蝦餅

仲有冬菇, 金菇, 粟米, 魷魚, 帶子, 溫室蕃薯, 當然唔少得係蝦啦

食完, 唔係幾夠喉, 追加了冬菇,  金菇同粟米

個金菇真係幾好味, 用紫菜紮上幾條, 好有咬口. 不過個賣相好好笑, 小志成晚都笑佢地似din仔, 好似俾人炸到din咗咁!

好, 再嚟都係炸嘢 – 鹿兒島黑毛豬

唔係講笑, 呢個真係好好食, 好驚喜, 連小志都不停話好味. 之前睇helloconnie個blog, 佢形容食件豬扒時覺得好幸福. 當時我唔係好明, 但係, 呢件一放入口時我都有呢個感覺. 有少少肥, 但又唔溜, 肉味亦都好好, 正正正正正!

咁當然, 都唔少得叫返件牛, 呢個都好食, 不過因為我一早都知佢好食, 所以無咗嗰份驚喜.

凍稻亭烏冬, 呢個唔駛講, 睇樣都知好食啦. 烏冬好煙un, 凍冰冰, 食落有一種涼透心嘅感覺,  夏天食一流. 呢個我地次次都會食, 好似有一次試過每人食咗兩個tim……

蟹肉炒飯, 食到呢度我已經飽, 所以只係食咗少少, 小志包底.

北海道牛奶雪糕, 好濃奶味, 不過唔夠滑.

埋單$2,200, 樣樣都好食嘅一餐.

p.s. 每年小志都會為我送上一個生日蛋糕, 好讓我每年都許下"身體健康"這個願望(亦是他的願望吧!) 今年都唔例外

第一次食一個嘅zoe 餅, 7吋cake索價$680. 坦白講係有啲貴. 不過, 小志呢份心意加上zoe餅嘅美味, 確係令呢個生日過得更完滿.

多謝小志冒著大雨去攞餅, 呢份心意我係唔會忘記嘅.

p.s. 1 曾經有朋友問我, 我出世時爸媽住旺角, 當時未有過海隧道, 我媽咪點樣可以咁快過到海, 去銅鑼灣生我呢? um.... 又係wor.... 所以, 我決定問呀媽. 跟住佢同我講: 吓?? 紅隧1972年已經通車喇wor! o, 原來係咁.......