情人節快樂！

大家好！好耐無ｕｐｄａｔｅ喇！各位近來好嗎？

聖誕新年我都好懶，今次一次過補祝返各位：

聖誕快樂！新年進步！牛年事事順境！身體健康！開開心心！

兼今日祝大家有無情人都好，都快快樂樂！

（真係好鬼懶！）

上星期我又去左打ｗａｒ　ｇａｍｅ！打到重傷，對大脾瘀晒！好痛！

自上年６月轉返老本行，本來都開開心心，因為個老細好，同事又好！點知．．．我真係要諗諗我係咪唔太適合依行，次次都唔太順利！返左３個月都唔夠，個老細走左，轉左個新老細！非常唔掂，攪到我都無晒心機，ｄ同事本來個個都相處得好好，比個新老細係咁挑撥離間，同事之間好有火！個個都做到唉唉聲！

我知好多同事都好唔滿意個新老細既做事手法，但係個個都唔出聲，有出路既都走得既走，走唔到既咪忍囉，比個新老細亂咁點，起ｄ咁既情況之下，以我ｄ咁唔忍得既性格，好聽咪熱血青年囉，我就做左丑人，同老細抗爭到底！

我覺得大家都係打工者，大家就到咪就囉，合作合作，咁咪個個都開開心心，最緊要係出黎個ｏｕｔｐｕｔ者，個新老細就係要攪埋好多無謂野，攪到個個都做到死先安落咁！推行一大堆新政策，自己入黎半年都無，就咪攪咁多野啦，唔係間間公司都岩用你果套架！推完堆新政策，一貫老細作風，分晒比同事做，咁你話唔做到唉唉聲就奇啦！

本來我都有諗過辭職，但係依度人工高，最重要係佢要炒我係一件好複雜既事，所以過得一日得一日，放長雙眼睇佢點攪！哼！