泰國之旅DAY2

成晚都唔係瞓得咁好,可能俾蚊咬啦,不過以前都係咁,仲要點蚊香先瞓到,今次都冇點,應該已經咬到冇感覺=.=瞓醒沖涼就去食早餐,因為平時買開嗰間冇開(紅日放假)所以我地就走咗出去搵食,我地就買咗海南雞飯返黎,呢度啲人係慣咗一早食飯,我仲要多包紅茶添,好耐冇飲過喇,好掛住丫>3<正~仲有叉燒包食添~食到飽飽~開電視一睇,又見到好多地方都有人搞事,好多地方都話封路,所以我地係咁打電話去問人,好彩都有好消息,終於可以去行下商場喇~~

酒店一角~~

首先我地去酒店接返阿龍,等佢checkout完就開始我地嘅行程,因為佢尋晚玩咗成晚,所以都係啱啱瞓醒,所以我地就陪佢食野先,去到商場就叫咗個海南雞飯,佢就真係好肚餓囉~好快就KO咗,仲叫多碟添~我地幾個就分咗一碟杧果糯米,之後就係shopping時間,佢都買咗唔少野,我就只係買咗對波鞋啫,跟住就係甜品時間XD

諗下食乜先XDD~~

好好味丫~^^/

每次黎親泰國都會去呢間雪糕店食雪糕,價錢十分抵,仲好好味添,因為要等同我阿媽會合,所以可以坐耐啲,之後就傾下計啦,搞笑野就出現喇^0^等我形容一下阿龍先,佢好怕熱嘅(第一日已經俾我地笑咗)最好去啲有冷氣嘅地方,仲有一定要住酒店,最好有埋SPA添~之後就問我地去到清邁係咪住酒店,我就同返佢地講(同行嘅泰國朋友),跟住就開始講笑,話係住廟架,我就話咁咪唔驚鬼囉,一入到去就會見到好大嘅佛像,仲會有好多和尚周圍行,我地已經忍唔住大笑,之後阿龍問我地笑乜,我就同返佢講,一講到話住廟,佢已經O咗咀,我地幾個又笑,仲係咁問係咪真,我話只係講笑佢都唔係太相信,之後我阿媽打黎,我地就返酒店等我阿媽佢地

佢地到咗酒店就話要沖涼先,因為今晚坐火車冇得沖,好彩我今朝沖咗啫,等佢地搞掂就出發去火車站

火車站外觀~~

好多人等火車~~

去到火車站會合埋我地最後嘅團友就可以出發~清邁我地黎喇))))))我地6點開車,聽朝應該7點幾8點會到,喺架火車都冇乜野做,影下相

我地個位~~

日落囉~~

食下野,之後就等人開床俾我地,張床都幾舒服架,不過開咗床就冇咁方便傾計,我就打下機,睇下書,好快就瞓著咗囉.....

我個床位XDD~~