祖兒下一個十年覓愛

09 年
容祖兒在下月舉行的音樂會上，將盡情演唱多首國語歌，希望給樂迷機會了解她的音樂。

        屈指一算，今年是英皇一姐容祖兒入行 10 年的大日子，回顧這 10 年的轉變，祖兒日前笑說：「o係呢 10 年我覺得性格上冇乜點改變，但係個人就煩o左好多，尤其o係工作上緊張程度比以前大o左好多，我以前係唔會為工作而失眠，但係o依家就會，可能我知大家都對我有期望，我又唔想交o的行o野出o黎，好似明知有o的o野可以唔使太認真，但係我點都要過自己o個關。

諗頭多多添壓力

 

99 年
初出道的祖兒樣子平凡打扮普通，估不到今時今日成為樂壇一姐。

 

        「我都知道歌手o既本份係唱好o的歌，不過我又想接觸多o的工作o既o野，所以呢一、兩年係多o左同公司開會，講過好多自己o既諗法，最初佢o地係冇乜信心，好多懷疑，跟住我又會用好多方法去說服佢o地，o係個過程入面要付出好多努力去爭取，雖然過程係好辛苦，唔單止每日工作上要提起精神，又要面對觀眾同傳媒，可能因為咁，我會更加珍惜屋企，只有呢個地方可以令我放低所有煩惱。」

        踏入下一個 10 年，祖兒在工作上會有新轉變，她笑說：「我最大挑戰對手係自己，所以我會將自己眼光放遠o的，睇o下自己可以挑戰得幾遠。」而一向交白卷的感情，祖兒又笑說：「呢o的冇得強求，我反而o係呢 10 年清楚知道，我係需要有o的乜o野人o係我身邊，因為以前會著重佢好唔好笑，又係咪我心目中o既條件，但係我發覺兩個人o既相處，第一個感覺係令大家都迷失，不過相處落之後，你會發覺可唔可以相處同體諒都好重要，呢一、兩年我打開o左自己o既心扉，唔抗拒去識o的真心對我o既朋友，o係往後o既 10 年，我會努力搵個o岩我條件o既人。」

 

著重與觀眾互動

 

祖兒一直以來都和媽咪相依為命，無論遇到甚麼困難媽咪都會默默在背後支持她。　資料圖片

        祖兒今年為入行 10 年將會舉行連串活動慶祝，頭炮將在下月 13 日於香港兆基創意書院演出「容祖兒 Moov Live 音樂會」，在這個音樂會上，祖兒表示有新嘗試，她說：「我同 Moov 今次係第一次合作，雖然今次個場地比較細，只係容納到 400 幾人，不過我都好興奮，一來o係音樂會度我會唱晒新碟o既國語歌，二來又好少o係呢o的特別場地搞音樂會，我諗到時o既形式會好開心，同觀眾o既距離拉近，互動自然會多o的，可能一o黎就唱，唔使 warm up。」

        祖兒續說：「我之前都有問過唱晒國語歌有冇問題，不過佢o地話冇問題，仲話o黎得睇o既人都係對我有興趣，叫我唔使咁擔心，所以今次係一個大嘗試，仲係一個好機會了解新歌背後o既故事，觀眾聽得會更加投入。」

迷失自我的日子

不知不覺間祖兒已在娛樂圈第十個年頭，回顧這段時間她直言得多於失。

        每年娛樂圈都有不少新人湧現，同行間的競爭又激烈，要站穩一席位實在不是容易事，未知是否人紅是非多，又或者被勝利沖昏頭腦，所以很多時每位當紅的藝人總被是非纏身，對此，祖兒慶幸自覺能力好高，她說：「由入行到o依家，我一直都覺得藝人都係人，成功係有好多o野要多方面配合，並唔係一個人可以得到晒所有o野，要得到成功，反而要多謝身邊o既人幫你，我好幸運身邊有真心幫我o既人。」

        祖兒續說：「我仲覺得娛樂圈係一陣煙，一個幻象，就算人o地讚你同覺得你好，你應該係做多o的o野鞏固自己，我見過一o的人成功有改變，所以我更加覺得呢o的人係一面鏡，用o黎警惕自己，千祈唔好咁做，做人要有自覺，同埋識得去感恩。

學懂調整心情

        「我都試過迷失自己，不過當時只係我唔識得欣賞自己，成日覺得點解做得咁差，就算好似得到一o的o野，都想做得更好，唔想令觀眾失望，最後咪變o左畀自己好大壓力，好似明明對腳係唔夠長，但後面有一道力係咁推我行，所以咪行到一仆一碌，我好少同大家分享，我覺得做得呢行係有壓力，所以會自己調整心情。」