文明古國埃及遊3

於樂蜀住了一晚，早餐後前往樂蜀神殿參觀，此神殿相比喀納克神殿規模雖然少一些，但其建築亦相當宏偉。樂蜀神殿為供奉底比斯的亞蒙神而建造。

經當地導遊講解後，才知道這兩幅牆刻的分別。上一幅為亞歷山大大帝攻佔後，想保存埃及的文化，用類同的雕刻技術刻上圖案，但細心啲睇，會睇得出係凹陷的。而下面為真正埃及雕刻方式，係凸出的。個人比較喜歡真正埃及的雕刻方式。

大列柱廊

拉美西斯二世巨像

曾到巴黎協和廣場的人，一定對此方尖碑不會感到陌生，宅們原是一對，埃及將其中一條與法國交換，換來一個時鐘。

之前曾提及，這一列獅身人面像原先一路延至喀克納神殿，但中途很多已損毀。

於樂蜀當地餐廳吃過午餐，便乘車前往洪加達，需時約4小時，黃昏6時許到達。雖然於香港機場已email洪加達酒店可否安排潛水，但一路都無回覆，於是即時走去Front Desk問，佢第一句反問我 - 你個guide喺邊，佢會同你安排，答唔到問題不特止，又無資料俾到，仲老點我去Aqua Centre，話個度10點開，我一聽就覺得怪，潛咗幾年水都未聽過Dive Shop10點咁遲開，由於當日6點幾已經天黑哂，諗住第二朝早啲起身出去睇下。

第二朝一早7點幾去食早餐，約7時45分走去dive shop睇，門口係寫8點開，不過係唔會8點有人返就真。

等到差唔多9點至有一個staff返，我即刻問我想去潛水，有無辦法安排到？佢話所有潛水trip要早一日4點前book，我話我之前send email去酒店無覆到，兼尋晚成6點幾至到hotel，真係無辦法。佢就問我如果去佢啲朋友度潛得唔得？我話無問題，個心諗有得潛就得。於是乎等咗一陣，佢朋友嚟接我，個staff叫我俾錢佢先，但我覺得乜都未見到咁快就要俾錢，所以當聽唔到。果個人帶我去搭的士，中途又轉咗第二架私家車，然後喺路邊落，帶我個人又叫我俾錢，我又當聽唔到，因為連Dive Shop都未見到。佢帶我行去海邊，試gear & equipment，見到有個鬼佬喺度，應該同我一樣係嚟潛水，咁跟住就坐喺度唔知等乜，後尾個鬼佬等得太耐，聽佢講應該等咗成粒幾鐘，發老皮走咗去，我就諗住等多一陣，之後個DM真係嚟喇！

講真Dive Shop個度其實幾殘舊及簡陋，佢叫我就咁將啲嘢放喺Dive Shop裡面，我就將啲錢放喺Dry Bag拎落去潛，就算濕咗，點都有錢起手返到酒店嘛！第一個dive係潛浸船，一落水已見到好多海狼，雖然佢地好細條，但數量真係算幾多。

之後喺船艙穿穿插插，船艙內都有好多魚毛，然後向岸方向潛返上岸，潛了約40分鐘。食過light lunch，再嚟第二支樽。此時帶路人問我俾錢，我見都潛咗一支，就俾佢啦！第二個dive雖然已經坐船離岸少少，但講真呢度啲珊瑚同香港差唔多，無乜色兼好多垃圾，好遠處見到一條spotted eagle ray，但好驚人，係咁游走咗！呢個dive好悶，無乜嘢睇，最靚係臨上岸前，於碼頭下見到好多軟珊瑚，令我即時諗起印尼Derawan碼頭及Raja Ampat Gam Island呢！

於Dive Shop hea咗一陣，DM車我返酒店，總算安全到達，鬆一口氣。後來到酒店Dive Shop攞資料，方便其他朋友第時嚟可直接contact Dive Shop，唔駛好似我咁。

Dive Shop資料 - www.euro-divers.com

佢喺洪加達Hilton Resort及Grand Hotel都有舖，我問過佢就算唔係住呢兩間，都有車接去Grand Hotel，由Grand Hotel碼頭出船，呢度約有50個Dive Sites。一日兩個潛為49歐羅，另加4歐羅為環保稅，如需租gear為16歐羅一日。

第二朝11點鐘離開酒店乘車前往開羅，於check-out時，Front Desk Staff話我有IDD call要俾錢，我就覺得怪，我都無打過IDD，後來佢問我有無電腦，我話有，佢話係上網費用，一睇係220美金，再睇啲細節，分別於14號晚，15號凌晨及15號晚上網數次，但睇唔到每次幾耐及點樣收費，我之後同佢講，我無可能喺15號凌晨2、4及6點上網，個時我瞓緊覺，點會上到網，佢話個system係紀錄咗係咁就係咁，我堅持唔會俾個啲項目，喺一路爭議期間，佢問我一個問題 - 小姐，你認為你瞓緊覺個時，會唔會有人入去你間房上網呀？我答佢唔會，佢回覆話咪係囉！個一刻我覺得自己係賊o既感覺。就算當地導遊講完，佢都話無辦法係要俾，但我仍堅持死都唔俾，時間一分一秒咁過，領隊只好俾咗我唔俾個幾項，回港由公司出面睇下有無得同酒店傾番，因為我地要趕及軍隊護送往開羅。喺俾錢個一刻，個Staff用英文同我領隊講 - 叫佢去到第二啲酒店要小心啲！我聽到個一刻確實係好嬲，但我無同佢拗，一次過返到嚟香港至寫番所見所聞去Hilton Group。

Hilton Hurghada Resort

對出海灘

乘車往開羅途中