長洲遊@20081019

10月19日，天氣晴朗，我地突然興起約埋堂哥同小二一齊入去長洲玩下啦！我地下午出發，今次係瑩瑩第一次搭船，仲要一次過搭兩種船。我地首先喺尖沙咀搭天星小輪過海，再轉快速船入長洲。瑩瑩搭天星小輪時都好乖好enjoy，但係當搭快速船時就開始扭計曳曳，好在船程好短好快到啫！

等船其間同媽媽影張合照先！

一起看海的日子

呢D咪係笑到見牙唔見眼囉！

忍咗好耐要扭下計先

入到長洲，我地首先食咗碗招牌魚蛋粉先，之後就開始四圍玩玩食食啦！第一站我地去咗食甜品呀，間舖頭細細但係都坐滿晒人要等位。我地點咗火焰雪山、心太軟、梳乎里、布袋蘋果批同涼粉冰，樣樣都好好味，價錢重比市區食平好多，正呀！當上火焰雪山時，間舖頭要拉閘熄燈，絶不馬夫嫁！下次再去長洲要再幫襯先得。

火焰雪山

心太軟

涼粉冰

食完甜品，我地開始向海邊出發！入到長洲梗係要食番粒大大粒彈牙魚蛋先，當我地等緊堂哥買魚蛋同時，瑩瑩就有收穫喇，我地買咗個搖鼓比佢玩，佢玩到唔肯放手呀！

我有一個靚靚搖鼓

媽媽個口同粒魚蛋一樣咁大喎！

食完魚蛋，下一站就係食薯仔喇！因為串薯仔要焗又好多人買，所以等咗好耐先有得食，好在有個搖豉可以氹住瑩瑩。我地買咗一串五個人分，瑩瑩都有得食，睇落串薯仔真係好大串咁，味道都唔錯啦！

搖呀搖，搖呀搖！

媽媽話有薯仔食，好期待呀！

你睇佢地幾咁sweet

你地影夠未呀，我等咗好耐喇！

食飽飽，又有得玩啦！海邊有個小公園，好啱瑩瑩玩，佢簡直黐住條滑梯唔肯走呀，佢仲變咗個Rock友係咁叫係咁跳添!

食完又玩，爽呀！

唔該望鏡頭啦～

媽媽投降喇，要瞓陣先！

玩完公園之後，我地就喺長洲四圍逛下，不過都好似冇乜特別咁，之後就隨便搵咗間食肆食海鮮，我見到好多人食又好抵咁，但係食完之後就覺得唔會有下次囉，真係平野冇好，下次都係做定資料搜集先。食完海鮮我地就搵咗間傳統甜品舖頭食甜品，佢好似出名食糕點，我地就主打叫咗幾款糕點大家share食，我最記得就係個芒果糯米糍，好味！食完甜品我地就起程番屋企喇，唔知幾時再有機會入長洲呢？