再見喇比利時!

比利時布魯塞爾最受注目嘅旅遊景點: 小便男童Manneken-Pis.

去得睇男仔, 一定要睇埋女仔: 小便女童Vincent.

途中, 我哋仲食咗街頭小食: 蝸牛. 加咗辣粉調味嘅湯汁, 令味道更突出, 辣辣哋好似食緊一隻隻大螺咁. Yummy~

之後, 我哋專程搭地鐡去呢睇比利時嘅凱旋門. 睇吓! 連車站內都咁有藝術氣息.

出站後, 要走過環境幽美嘅Cinquantenaire公園先到達目的地.

雖然佢唔及法國巴黎嘅舉世聞名, 不過同樣係壯觀宏偉.

之後去咗裝修一啲都唔豪華嘅名店區, 而最後一站就想去皇宮. 點知傻更更嘅我哋, 以為揀錯站出, 走去搭返轉頭一個站, 再走過去. 但冇仔細睇地圖嘅我哋, 由路面錯誤地行返去頭先個站. 好白痴呀!! 仲有, 到依家我先發覺, 原來行嚟行去, 都係喺皇宮嘅後花園, 如果喺早一條路轉彎, 我哋應該去得成.  唉! 惟有望下次有幸再嚟啦!

搭返去總站準備搭火車返荷蘭, 點知又糊里糊塗搞錯咗變相又走車. What's happened to me??? 今日究竟發生咩事? 點解我忽然咁蠢?? 喺等車嘅呢段時間裡, 我哋惟有周圍行吓. 經過呢間賣比利時嘅著名出品朱古力, 又忍唔住入去行吓. 同事好鍾意食, 於是買咗好多.

又喺站外搵咗間好有氣氛嘅酒巴坐低, 飲杯比利時啤Hoegaarden. 塞翁失馬焉知非福, 加埋小食Salami, 我好Enjoy呢一小餐. 佢嘅啤酒出名得嚟有道理, 好鮮好好飲! 喺Bar度飲只需俾2蚊歐羅, 而喺Supermarket度買都不外乎1.3左右, 喺歐洲呢度算好抵!

Thanks GOD! 最終都能順利返回荷蘭, 不過就比預期中遲咗好多, 成12點先到. 好在返酒店嘅交通工具路上輕鐡依然運作, 安全送我哋返抵酒店. 今日, 無論自己點搞錯, 問題最終都能一一解決. 原來, 我哋一直行緊運.  (下圖: 呢次比利時之行嘅手信.)