皮蛋酥

卒之都收到呢個皮蛋酥。

喺好耐好耐之前，當大家仲喺梨樹山莊嬉戲渡日嘅時候，阿芝曾經同我講過他日嫁得出的話，一定搵成擔皮蛋酥質死我。當時大家都當為笑謔。

然後，好多事發生咗。

好多好多年之後，當年office入面班人而家都各散東西。從貝芝口中一直都聽到關於佢哋兩個一齊發展成點。當初完全唔睇好嘅我，不得不承認自己係唔化，同時亦對佢卒之修成正果帶點老人家嘅欣慰。

今日ET放完假返嚟（咁都冇俾地雷炸死，又證明咗呢個世界冇神），成個office即刻嘈返晒。佢出去開會嗰陣Joico好識做咁話佢件羽絨好靚，佢即刻鬆毛鬆翼咁，話件嘢「靚到冇得再靚」（連形容詞都貧乏過人），又話「暖到嘔，我底衫都冇著」。聽到佢呢句，我就真係差啲嘔咗出嚟。

估唔到佢同EK都係今個月生日，尋日我哋切完，今日輪到佢哋嗰邊。五點EK去咗聽講座，大家等收工。Joyce過咗嚟呢頭買衫，我六點雲落去搵佢一齊行去旺角。阿芝約咗七點半喺骨煲皇，但係貝芝七點半至喺公司搭的士出嚟，於是喺朗豪坊等埋佢，跟住至一齊行過去。

去到阿好(Mandy)、阿芝同Danny都喺度。坐低食嘢，傾吓笑吓，跟住收到佢嘅帖。

當然仲有個皮蛋酥。

每次同佢哋食飯都係開開心心。十點左右走，阿好走咗先，我哋話去食甜品，原本諗住返屋企瞓教嘅Joyce行行吓都同我哋一齊去咗糖百府。

上次同孖芝嚟又係等餐懵至有位，不過上次就熱到暈咁滯，今次就寒風陣陣。等到十一點咁滯至有得食，食埋個冰就各自返屋企喇。