odm watch

10月7日去旺角行街，到潮流特區行街，去到某間錶舖，見到呢隻odm既錶，因為覺得好靚，所以買左。

點知惡夢就由此開始。

隻錶用左幾日就爛左，仲係爆殼。因為果日剛好同Ray哥哥+Sally食飯，而Ray哥哥第二日又出開旺角。咁我就將隻錶交左俾佢去換。由於隻錶買左唔夠一個禮拜，錶舖就好順灘咁換左。

點知新錶帶左唔夠三個禮拜，由10月7日開始計，仲係唔夠一個月，又再係同一個位置爛左。

咁只好再拿拿淋攞去換，心諗唔夠一個月應該仲有得換，其實，當時有諗過就算換左，可能都會再爛，但又諗唔起叫佢換款。唉~~

點知今次去到，個Sales今次好似早有準備，叫我留低隻錶，仲話應該要維修，要報價。咁我話隻錶買左唔夠一個月收我維修價？咁要幾錢。佢話上次個客收左約$200，我話隻錶都係$520，收$200。即隻錶要成$720?咁咪好貴！咁佢話無計，咁我更加無奈，只好留低隻錶。個Sales仲話個行街要3個禮拜先再黎，約3個禮拜後會call我報價。真係無奈加無奈！

結果，個行街真係12月2日(禽日)揾我，真係話要收$200維修費，我話我一定唔會俾，叫佢俾返隻錶我去消費者委員會投訴好過。跟住，佢話佢地d錶有QC驗過先出街，咁我問佢，佢地拉幾磅力，個Sales就答唔到我。跟住，我表明我做玩具，叫佢俾返隻錶我做測試，佢聽到我咁講，即刻話同經理再傾下。會1、2日內覆我。

跟住佢真係今日覆我，就話唔可以退錢或換款，佢再話個師父話隻錶咁係因為撞過先會咁。我話我從無撞過，我只係帶同除錶時，隻錶爛左。呢個係千真萬確既事實。

咁佢話佢同經理商量過，我可以用半價買佢公司任可一款既錶，只要有stock。就一定俾我買。

起初，我好抗拒，因為對佢公司已經失去曬信心，但又唔想白白用左$520買左隻爛錶，所以要求佢俾時間我諗下。佢話咁佢俾1個月時間我。但我要求佢一定要俾返隻爛錶我，咁起碼我有証有據！

跟住我即刻打去消費者委員會問，呢個情況，佢地受唔受理，佢地話只要我保留單據，同埋，維修張單，作為証據，佢地會受理。我問佢正常佢地會點做，佢地話收到正式投訴後，佢地會落site同佢地傾，但就無講會有乜結果。

所以，而家正煩惱應唔應該接受個offer，定把心一橫去投訴好呢？真係好鬼煩！