海嘯大輸家

被喻為百年難得一見的金融海嘯，計我話係百年難得一見的騙局至真！四月尾的時候，政府才公佈最壞的時候未到，預計未來將有第二第三波湧至，預計失業率持續上升等等。說時遲那時快，五月初中期又說根據香港及外圍經濟數據顯示，最壞的時候已在第一季發生，出口貿易等數據正在回升，但預計今年仍艱難。

簡直就係出口術，成日話經濟差，助長無良僱主大條道理裁員，唔計凍薪、減薪、無花紅、無OT、放無薪假等等奸招。再睇股市樓市，更加無眼睇，又話未來前景唔明朗，淡友死晒啦，已經牛市喇喎，仲要日日樓盤都聽到投資者一掃10間等，又俾炒家炒旺咗個市。

再說市面氣氛，sorry，由day 1到而家都唔覺得差過，食飯依然勁等過百張飛，買衫價錢不跌反升，見到SOGO又感謝週，閒日下午三四點入去都迫餐懞，入舖頭要排隊、睇野要排隊、俾錢都要排隊，未拿到貨已經好攰。價錢真係唔覺平，以某牌子的面霜計，價錢跟上年不變，但贈品就少了一支精華素（同樣情況出現喺數個品牌），當然依然係大把人爭住俾錢啦，仲要部份斷晒貨，離晒譜！

真係好感慨，經濟好的時候又唔見加人工，經濟唔好又擔心失業，投資成為大閘蟹、買野又貴又唔夠人搶，此為海嘯大輸家是也！