卓桐出院了...

卓桐今日終於出院了,在這12日的住院期間,真係好感激大家對妹妹的關心與祝福,更加要多謝一直在我身邊支持我的家人及朋友,冇左妳地俾我既支持,我怕自己真係撐唔住,特別要多謝D6深切治療部及C6病房所有醫生,姑娘和嬸嬸,你地真係一班好好既醫護人員,住院期間,妳地對卓桐既悉心照顧,真係令我好感動,thank you very much!!

記得25號既早上,妹妹因發高燒,出疹及尿液呈橙紅色入院,經過抽血,驗尿等初步既檢查,証實佢患左尿道炎,上呼吸道線狀病毒感染,加上佢冇胃口食野,又嘔,醫生覺得佢開始有脫水現象,所以即時為佢吊鹽水及葡萄糖水.
26號驗血報告返左,發覺妹妹既肝酵素比平常既小朋友高出10倍,數字非常驚人,當日醫生亦証實佢感染了肝炎,而尿液報告返黎都証實係佢既尿液裡揾到白血球,紅血球同埋蛋白,醫生繼續為佢落抗生素.
27號情況一直冇好轉,當日卓桐依然係高燒,曾經一度去到41度,之後又回落至40度.全日冇食過野,只係訓.醫生擔心佢患上川崎病.繼續為佢落藥.
28號卓桐開始進入半昏迷狀態,成個人腫左,手腳眼睛腫到好恐怖,眼睛更加張不開,連喊都喊唔出眼淚了,醫生臨床証實妹妹患上腦膜炎,同日中午即轉送到深切治療部,當日亦做左好多不同既化驗同埋檢查,情況唔樂觀..........
29號卓桐依然係好呆滯及疲倦,任由醫生姑娘打針檢查都無力掙扎,連喊都冇力.早上做了抽骨髓檢查,下午部份報告返左証實妹妹腎衰竭,肺積水,腹腔積水,腦炎,血色素下降,肝脹.因腎衰竭令排尿系統出現問題,大便驗到感染諾沃克病毒.
30號經過醫護人員既努力,妹妹情況開始好轉,開始醒過來聽到我地叫佢,亦會俾到反應我地.
31號上午妹妹開始可以自己坐起身,亦開始飲到奶,情況康復得好好,醫生決定幫妹妹拔走尿喉及鹽水,等佢靠自己,好彩妹妹都好乖,唔駛用尿喉2小時後識得自己排尿,到了下午醫生再決定俾妹妹返回普通病房繼續治療.不過血色素仍然偏低,有可能要輸血.
1號及2號這2天妹妹都康復得好快,亦開始退燒,血色素開始回升.
3號晚上醫生更為妹妹拔走大脾上的道管,準許妹妹回家休息.第2日早上9時再回醫院
4號早上回醫院卓桐10隻手指開始甩皮,出現川崎病徵狀,唔準出院要睇多一日,不過晚上仍準許回家休息
5號即今日早上回醫院,醫生睇睇手指冇再甩皮,解釋這是川崎病後期的皮膚脫落,冇乜大問題,同日中午終於可以出院了
下星期繼續回醫院抽血,做心電圖,磁力共震等,keep住做檢查及覆診

這12日真係很難過,尤其入ICU果幾日我成個人陷入崩潰狀態,我真係以為妹妹就咁就離開我地,我喊住同醫生講,一定要幫我救返個女,我唔可以冇左佢,這些情節平時睇電視先會見到,估唔到如今發生係自己身上,更加體會到健康既可貴,最後希望大家都能夠擁有健康既身體,開開心心過每一天!!

後記:
係卓桐身上仲未揾到係邊隻菌令到佢今次咁樣,所以醫院請左微生物學家幫手進行化驗,希望佢地可以盡快幫我揾出答案吧!!