流浪漢??!!

 

蕎寶寶同流浪漢，

好似點都扯唔上關係，

點解囡囡你會變左流浪漢？？

就要由星期一講起。。。

 

 

星期一因為好多野做，

媽媽趕唔切返公公婆婆度食飯，

不過係電話度就聽到婆婆話囡囡你有sneeze & 鼻水，

都有少少擔心，

可能星期日係維園冷親，

不過返屋企見到你又唔係太嚴重，

不過都有食藥。

 

星期二仲有鼻水，好似仲有少少咳，

又冇發燒，

所以就繼續食上次去旅行時問醫生拎左既藥。

 

星期三仲有少少鼻水，

星期四個鼻鼻好乾淨冇鼻水，

以為好返安樂晒。

 

 

星期五零晨１點幾，

聽到囡囡你喊，所以醒左，

以為你又係發夢，

點知一望，

成面成頸成個枕頭都係奶，

忙住安撫你，

仲有換衫抹面，

點知又再嘔，

嘔埋都有４，５，６，７次，

成晚就係嘔～～

 

可能見爸爸媽媽既反應係好驚，好緊張，

你以為我地鬧你，又比我地嚇親，

加上唔舒服，

所以又喊起上黎。

 

囡囡你知麻，

你比一切都重要，

最緊要就係你冇事，

爸爸媽媽又點會因為你嘔到成床係，

要換衫，換床單，要幫你抹身抹面，

成晚冇瞓而鬧你呢？？

 

捱左一晚，

嘔晒奶就嘔水，

又肚餓，

你就要求爸爸開奶奶，

點知飲完又嘔，

飲水又嘔。

 

見到你咁媽媽真係想喊呀，

本來想送你入急症室，

但係又怕會等好耐，

又怕會要你入院，

所以爸爸媽媽最後決定帶你返佐敦睇私家醫生，

一直打電話去約時間，

但係都未有人，

直至９點鐘打去有人接，

但係竟然要等到１２點半，

冇辦法，

唯有早Ｄ去等，

睇下可唔可以攝到時間早Ｄ睇。

結果都等左差唔多兩個鐘。

 

你好乖呀，

雖然等既時候都有喊，

不過見醫生既時候就好乖冇喊，

等醫生可以慢慢幫你檢查，

又可以慢慢解釋你既病況比我地知，

同埋教我地點樣照顧你。

 

睇完醫生，

媽媽下午就要返工啦，

爸爸就帶左你返屋企先再返工，

 

公公婆婆已經係我地屋企等緊你，

仲買定材料煮左你鍾意食既野，

怕你唔鍾意仲買埋包包，

你睇公公婆婆幾緊張你，

不過醫生話要餓下你，

要空肚食藥，

之後就算食都唔可以多。

 

你竟然又好乖肯食藥，

之後就瞓左，

可能因為成晚冇瞓啦，

一路到爸爸媽媽放工返黎都未醒，

婆婆仲千叮萬囑唔好同你沖涼，

怕會冷親，

爸爸媽媽都係咁諗，

不過尋晚嘔奶，

一頭髮都係，

就咁抹又唔夠乾淨，

有一陣臭味之餘，仲。。。。。。

成個流浪漢咁囉～～～

 

寫呢篇ＢＬＯＧ既時候已經好返好多，

只係仲有少少＂吽＂，

仲幾有胃口，

成日都話要食＂粉粉＂，

不過醫生話左唔可以比你食得太多架，

所以唯有厄你話食晒啦，冇粉粉啦。

見你失望既樣，

心情真係唔識形容，

不過小病是福，

你病情冇嚴重落去，

媽媽都非常感恩。

 

～～～～～～～～

 

呢張相可能唔夠清楚，

Ｄ頭髮係（痴）埋一舊舊，仲有陣陣臭味，

成個流浪ＢＢ。

 

好返好多啦，至少冇再嘔，

不過可能好攰，

玩一陣就要瞓。

 

 

 

＜＜號外＞＞

 

媽媽知道呢幾日學校會派彩，

所以日日都有留意信箱架，

星期五放工返到屋企果然就等到啦，

係上午班，

得３０個位架咋，

真係好驚喜，

本來都以為上午班多數會被內部認購，

老師想收佢都未必得，

依家收到信，

真係安樂晒ＬＵ。。