發脾氣的媽媽

2008-10-13

聽日媽咪需要到私家醫生覆診, 爸爸話請假陪我, 真係令我受寵若驚, 除左第1次到QE照超聲波時要我講幾次至陪我之外, 我都已經習慣自己一個人, 本來媽咪就話如果請假不如10月22日先陪我啦, 因為果日媽咪除左覆診外還要返學校, 但爸爸解釋係原來佢今日有個會唔想去開, 所以.....我明白啦, 仲以為今次咁細心添!!

唔知點解覺得自己呢排情緒唔係太好, 容易為左一d小事發脾氣, 受害既就係鍶淇, 但每次閙完佢自己又好內疚, 好似今晚因為佢唔專心食飯, 好似發緊夢咁倒瀉湯, 我一邊拖地一邊閙, 見佢個樣好驚, 自己又好內疚, 但又驚控制唔到自己繼續閙佢, 唯有入房冷靜, 但腦海不斷湧現鍶淇既可憐樣, 於是眼淚不停湧出來, 自己真係好唔開心, 但出便爸爸從來唔識得當媽咪發脾氣時擔當安慰既角色, 只會加多幾句去話鍶淇既不是, 仲踩多2腳, 媽咪聽完之後更唔開心, 點解同爸爸講左咁多次佢都唔改, 好耐都未試過喊得咁盡情....後來媽咪叫左爸爸入房, 叫佢唔好再加多把咀閙個女, 反而要安慰下個女, 之後爸爸都作出改善, 等鍶淇食完飯, 媽咪既心情亦都平覆左, 叫左鍶淇入房傾解, 本來以為鍶淇一定眼濕濕, 但一入房時見到用手掩住個口, 想笑又唔敢笑, 個傻女梗係見媽咪唔再嬲佢, 所以好開心.............唉! 雖然同鍶淇講左對唔住, 但唔知幾時又會發生同樣既事呢???