武林盟主來了

上次講陳太,  話佢鍚身,  段估佢都唔會咁大犧牲,  拋個身出來參選,  但今次真係估佢唔到,  唔讚唔得.

陳太今次拋下身段參選,  係一個對個人來講的突破,  如果一如民調結果,  選到梗係一天光哂啦,  但到時要犧牲好多同家人一起的時間,  佢已經退休享受緊生活,  又要走回頭,  週身唔得閒,  重要日日同政府嗌普選,   講民主喎,   明知不可為而為之,  簡直同愚公移山無分別,  另一方面特首真係多得佢唔少,  日日逼埋身,  連帶外國傳媒又日日追住問---幾時有普選方案呀?  打算點行法呀?  等等..........,  得罪特首唔在講,  得罪埋中央重無運行,  特首一向都唔喜歡佢成日走出來指點江山,  講埋哂的批評政府言論,  外國報紙又捧到佢天咁高,  當堂將特首比下去個下先死丫嘛.  中央就更唔鍾意佢唔聽話,  成日扮到成個民主女神咁走出來,  講埋的對抗說話,  映得國家好獨裁咁,  前朝特首董生都成日奈佢唔何啦,  萬一做埋立法會議員,  成個武林盟主統領泛民出戰咁,   你話係咪來勢兇兇喇,  好難招架喎,  理你又唔係, 權不在我手嘛,  唔理你,  外頭又話我唔民主,  不知點算好喎.

相反,  如果陳太落選,  泛民呢鋪真係死梗,  連民主女神都唔受歡迎,  無選票,  咁下次條路點行呀?  重有乜口號出來參選呀?  對頭政黨笑死啦,  自已第二梯隊怨死啦,  之不過陳太更加唔好過喎,  被人笑自大唔在講(你估真係民主女神咩, 哈哈哈),  重要參選期間受到謾罵同抹黑(現在未開始,  但愛國派慣用手法之一,  今次點會唔出呢招),  臨尾名譽都無埋,  幾十歲人點計條數都唔化算,  諗諗下對佢真係百害而無一利喎,  如果話佢想選下任特首,  實無份,  因為要中央欽點,  幾時輪到佢,  你估真係佢一出就有普選咩,  所以今次佢肯出來選,  我真係由衷佩服,  在此祝佢成功.