hea 到痺, 真係嘆!!!!!

玩完熱汽球行完街, 返上船休息等食午餐, 呢個上午好清閒, 鬼咩, 今朝咁早起身! 一早玩完咯.

原來上一日趕住玩完樂蜀所有景點, 今日下午要開船離開喇, 唔怪得咁趕啦.

等食期間當地導遊帶來紀念品賣給大家, 是銀器首飾和T恤, 據說在街上無得賣, 因為是用埃及文字串客人名字, 做成飾物或繡在T恤上, 所以要訂做, 一日起貨, 團友都很有興趣, 但我不想把自己名字放在衣服上, 費事出街人人知我個大名, 而且銀器很貴, 所以我"八"了一輪就走了, 在船上到處參觀.

因為昨日早上要早起身, 又遊覽了一日, 晚上回船時已很累, 今日又要早起, 所以昨晚吃完晚餐後就回房睡覺, 現在才有時間看置身的遊船到底是怎樣?

一入門口就是大堂及接待處, 在船的二樓, 地方細細算整潔, 右手邊接待處旁推門進入就是客房, 我就是住在這裡, 有門隔住, 所以不會聽到出面聲音, 很寧靜, 唔錯.

四樓就是船面(我唔知係咪咁叫), 即係以下看到的休憩地方, 泳池所在.

見到呢度好開心, 一排排沙灘椅, 心諗下午我可以上嚟hea, 遊船河, 吹風, 睇風景, 睇書, 聽歌, 平時睇戲睇得多, 覺得好鬼嘆, 今次自己有得試吓, 唔知係咪想像咁正? 

盡頭處就係小小泳池, 真係好細, 一撐腳去咗對面, 所以無人游水, 直頭係擺設!!!!!!!!!!!!

其實泳池做形幾靚, 可惜太細, 如果唔係, 下午可以泳水啦.

前面左右兩條樓梯就係由船面落嚟另一面, 有蓋部份, 擺放咗桌椅, 供大家使用, 照片下方係水吧, 每日下午3:30有下午茶供應, 有小食及飲品.

呢份下午茶唔錯, 埃及咖啡幾好飲, 曲奇&蛋糕都好好食.

三樓係餐廳.

午餐唔錯啩, 顏色又靚, 唔食得都睇得啦.

埃及人都食飯架, 主食之一, 不過唔同我哋, 佢哋主要係食炒飯, 唔知佢哋用乜炒, 總之一定有一D好細碎嘅嘢加入, 有時有顏色, 好似下面黃色嗰堆就係炒飯, 味道? 都OK架, 我成日唔想食燒雞, 咪剩係食飯囉.

今日整個下午都係留喺船上, 所以大家各自享受悠閒的半天, 我有哂準備, 有歌聽有書睇, 真係開心, 平時在香港放假, 如果在家總係忙呢樣忙嗰樣, 未試過乜都唔做, 只做自己喜歡的事, 好嘆, hea到痺, 我鍾意呀~~~~~~~~~~~~~~~

有年青團友唔知會咁得閒, 乜都無準備, 機又無得打, 書又無得睇, 歌又無得聽, 街又無得去..............呢半日在船上悶死咗.

哈! 真係同人唔同命, 我就超享受, 佢就超苦悶, 同一處境兩種心態, 人就係咁奇怪嘅動物. 

其實兩岸都好多嘢睇, 呢幾間屋又大又整齊, 又有田, 直頭豪宅, 而另一間呢就..................

呢間幾簡陋, 又殘, 兩間屋好大對比.

河邊有人取水, 又有人玩水, 有小孩無著衫, 唔知係咪沖涼?

河上風景好靚, 遊船河吹住微風睇風景真係一種無以上之的享受.

街上都時時見到婦女用頭頂嘢, 埃及婦女重係用呢種方法搬東西, 成日咁做, 佢哋條頸唔知會唔會勞損呢?

時時見到岸邊D人好悠閒, 男女老幼都係咁, 無嘢做坐喺度望住條河, 務農好似比我哋呢D城市人自在喎.(冏)

捕魚都好似好悠閒, 條河好清潔無污染, 應該收穫唔錯啩.

黃昏景色好靚!

呢間屋頂有"鑊"架, 重唔係有錢人家?????

呢張相好似剪貼, 效果好得意.

晚餐時突然音樂響起, 侍應排成一行, 經理在前面拿著蛋糕, 後面一路行一路唱歌, 全場跟住拍手打拍子, 原來有賓客生日, 場面好熱鬧好開心, 難得咁有心, 加哂分.

隻船行咗半日, 終於天黑先到水閘排隊, 尼羅河一日有三百隻船要經過水閘, 所以排隊都好耐, 我哋隻船要排到半夜先經過水閘時為半夜3:30, 同周公不知幾好傾, 邊得閒拍照吖.