網誌分類：香港以外 |
圖片
網誌日期：2009-11-04 11:00
離開車路士球場，時間差不多三點了！
我地還要去 Harrods 買手信呀！因物價高昂，係 Harrods 買既小手信都係俾至親好友的！主要都係買ｄ袋仔，銀包同茶葉等！而且全部都係係 Ground Floor 既 Souvenir 區買既，因其他區賣既都係貴價貨 lu．．．
俾完錢之後諗住走之際，咦！唔對路，我自己大概計過唔駛咁多錢架噃，再 check 返單，原來佢計多左我一盒茶葉收多左我錢，收多左成 7鎊呀！咁梗係同佢講返啦，因為我之前問佢買咖啡豆係邊樹，佢就話將多收左既錢退返落一張 shopping card 度，我用黎買咖啡豆囉！我通常都唔 check 單既，今次又咁好彩俾我發現左！
行完晒，ｄ手信買晒但都係搵唔到啱既野俾呀媽噃，咁我地就決定回程時係 Amsterdam 機場買木屐款毛毛拖鞋俾呀媽喇！
行完 Harrods，又坐係路邊休息一陣，跟住就去 Covent Garden 行下喇！去到時大概四點度，可能係星期五既關係，已經有好多人！見到有人做街頭表演，有的玩小把戲，有的玩雜技，有的表演自彈自唱，有的表演女高音等等．．．好不熱鬧！可能我地都幾攰，只係行下睇下，好似無咩心情欣賞！下次有機會一定要漫遊呢個 Covent Garden！
行完一圈都係返酒店取行李好了！因為太攰既關係，我地係酒店大堂又要小休片刻，先再行去火車站！我地既火車去曼徹斯特係 9:40pm，但我地去到火車站只係五點幾，咁我地就係火車站搵左間 Pub 食晚飯，本來想食扒既，點知佢話賣晒！咁就唯有叫個 Pizza 同兩杯可樂啦！
可能我等野食期間係度睇呢幾日影既相，店主睇出我地係遊客，其間我細佬行開左時個店主走埋黎問我有無去動物員，我就話無喎，點知佢叫另一個侍應埋黎，咁我心諗唔係想介紹我ｄ local tour 係嘛！佢埋到黎後，個店主就指住個侍應同我講：咁你可以同呢隻馬騮影張相丫．．．（因為佢又瘦個頭又亂到好似馬騮咁）
個侍應即刻打佢一野之後行開左，哈哈，咁都得．．．又幾好笑喎．．．
Pizza 黎左喇，又估唔到佢幾好食喎．．．呢餐又唔貴，只係 10.55 鎊！
食完之後我地仲有時間淨，就係度 hea 啦！ Hea 差唔多時間先去大堂睇告示板睇下邊個月台上車！
點知呢個告示好遲先出架，其間我見咁耐都唔出我仲走去問人添．．．驚死去錯地方嘛！
佢差不多成 9:25pm post 出黎話俾人知邊個月台！因為係夜車，無咩人搭！成程車都好靜好舒服！講到呢程火車就真係要讚下維珍，可以網上訂飛之餘仲有 Early Bird 優惠，我早飛可以係 8 鎊一程咋！我 check 過如果搭 coach 都要十幾鎊，仲要搭５個鐘，我而家只係搭兩個鐘咋！
去到曼徹斯特，出左火車站就搭的士去酒店，因為成十二點幾，係條街行驚唔係好安全！
去到酒店 check-in 都好快，房間又好乾淨整潔，好過倫敦果間多多聲！
攪掂晒就瞓喇，因為明天要去造訪利物浦！
華工Ah水 2009-11-10 22:54
網上訂,再去附近火車站攞飛.
Takuya2009-11-11 00:02
咁快有飛攞既？我上次要搭車果日先俾我 print 飛呀．．．
咁你記得都要帶埋張 email confirmation 去呀！
至於搭巴士既問題，我聽日答你！
浪人 2009-11-07 22:23
Takuya2009-11-10 00:02
華工Ah水 2009-11-06 23:25
我買左火車飛要£26來回,不過限時限刻搭指定班次
Takuya2009-11-07 01:36
平就係咁架喇，但慳好多噃！
你係咪網上訂飛架？我見你已經有 tickets 係手既？
因我係網上訂飛，我到左 london print 左飛之後，入閳時佢仲要問我攞張 email confirmation 黎睇架，如果你都係網上訂，到時最好帶埋張 confirmation 去喇！
~ 魚 ~ 2009-11-05 03:22
終於黎到我呢頭了 ~
8 pounds 真係好平呀, 我剛訂了車票 12 月頭落 London, 來回都要 33 pounds, 仲要已經係優惠價了 ~
I Love Covent Garden !
Takuya2009-11-05 16:25
係呀，８鎊真係好抵！
我都鍾意 Covent Garden ，好 relax ，好好 hea！