深圳第三屆Carava杯定向分站賽--蓮花山公園

原先香港天文台預計今天係雷暴, 可惜天公做美, 整日都好好陽光.

由於2點半可以出發, 我驚係公司去目的地會遲到, 所以一早請定假, 放便自己安排時間. 我想先去atm禁d人仔, 但竟然行哂個商場都搵唔到一間中銀, 只得一間大新, 不過佢個人仔提款服務只限大新用戶, 即係冇用.

眼見要遲到, 拿拿臨去搭小巴, 點知等咗3個字先有車, 未跑已經成身汗. 最重要嘅係, 我白痴咗, 架小巴去到落馬洲, 我竟然走去搭黃巴去黃崗, 正確方法係去對到馬路搭綠van去落馬洲管制站.

係關口出關後, 發覺點解冇地鐵站嘅 由於已經係2點15分, 所以唔理三七二十一, 跳上的士先算. 好彩我知道自己d"煲東瓜"實在一流, 所以一早寫定"關山月美術館"係張紙上. 個司機果然聽唔明, 我只好遞張紙俾佢睇, 佢就識去.

去到之後拿拿臨搵返d香港賽員先, 由於我只是small potato, 冇人識我, 只好睇吓邊d人係熟面口嘅, 果d就係香港人啦. 一路游吓游吓, 見到有人問我係咪香港嚟嘅, 就緊係話係啦, 原來佢就係幫我地報名嘅B佬. 有眼不識泰山, 失敬失敬!

聽佢地講原來我地可以唔使跟時間出發, 因為都係跟張指咭離開起點果吓開始計. 早知等我唔使咁趕打的過嚟, 17蚊人仔架. 不過算啦,反正係黃崗我都係唔識過嚟, 一定要打的.

化妝完後就出發lu, 下面係張地圖(可點擊放大), 再下面係我張號碼布(貼紙?).

好似話我係好榮幸咁代表中國唔知邊個團體(聽完都唔記得), 不過是但啦,我都係志在參與同體驗一吓國內係定向同香港有咩分別.

一開始都冇乜野,都知自己係邊, 只是去2號point時, 因為附近整緊路, 所以條路上面一個一個沙丘(有4-5個), 要跳過去(個沙丘最高去到大脾咁高). 一路邊行邊跑, 都冇犯錯.

當打完6號point, 就變成失魂魚, 向著10號point跑過去, 當跑到一半時, 發覺唔對路, 明明頭先打完6號point, 點解依家會打10號point. 諗多兩諗先發覺錯咗,拿拿臨返返去7號個路交,再去7號point.

基本上之後都已經冇大失誤(因為冇可能大得過睇錯point), 只是自己已經跑唔郁,打完11已經不斷咁行, 當去到14時先回到少少氣,可以跑一陣.不過都無補於是, 最後行返20號point就開始百米定向.

一開始百米定向, 我其實係搵唔到自己係邊, 一路都睇唔到個3角型, 望咗好耐先定到位.定完位仲要理解張圖, 因為圖中55呢個control unit要打5次, 我望咗好耐,55呢個字到底係第55個point定control unit 55?? 明白哂之後都冇乜問題lu, 就跑呀跑, 只是29號point同36號point就2次都跑錯, 去咗隔離果個unit, 激死我.

最後打埋個finish就ok, 不過個finish收得好隱蔽, 係"終點"個牌嘅後面, 要行到去個牌先見到個unit. 由於太熱關係, 打完finish就去咗飲水, 我竟然唔記得咗攞飛仔(成績). 結果我唔知自己跑咗幾耐, 更唔知有冇俾人DISQ到.灰爆

之後天公開始不做美, 隆隆雷聲不斷咁嚮起, 我呢d平時做得虧心事多, 早走早著. 係少年宮站搭地鐵去福田口岸, 過關後再轉九巴B1返元朗, 買完甜品後搭輕鐵返屋企沖涼休息.

是日車費:
屯門-->落馬洲(綠van)$11
落馬洲--黃崗(黃巴)$7
黃崗-->蓮花山公園(的士)$17人仔
少年宮站-->落馬洲(地鐵)$3人仔
落馬洲-->元朗(九巴)$10
元朗-->屋企(輕鐵)免費

總括嚟講呢個場真係好好跑, 冇乜太多上落山. 大部份都係可跑性高嘅白林或石屎路, 對於我呢d冇體能同冇技術嘅人嚟講都冇乜太大分別,只是行得冇咁辛苦.