杜汶澤 - 合氣道

杜汶澤貴為 903 其中一位知名合約 DJ
唔首首歌上榜其實都已經偷笑
而上榜既唯一一首歌《開心到震》
47 次播放率，其實亦唔係話好突出
高 airplay 過呢首歌既爛歌亦大有人在
例如 Sun Boyz 既《Tic Tac Toe》
又或者做作到爆，泳兒既《你我他》
咁 47 次如果計入人為 (簽約做 DJ) 同商業 (電影主題曲) 因素
響商業電台有如此成績我覺得可以理解
如果響新城的話，可能已經三甲甚至冠軍

呢張專輯要彈既地方亦實在太多
封面響 MV 一幕中 Cap 出黎再 key 落一個核凸背景已經夠衰
可以話係低成本到極致

歌曲方面亦太多不足既地方
《合氣道》一首平平無奇 (由音樂，編曲到唱腔，音域都係) 既歌
交響一個唔識唱歌，讀書都讀得衰既人手上
可以話係事半功半
成首歌完全無起伏 (唯一聽到 Janice 果幾句先知係一首歌)
搵黃秋生黎明應昌佑衛蘭黎 featuring
不如搵佢地是旦一個唱仲好

《誰教我》本來係一首勵志，鼓動人心既感動之作
結果呢？勵志就唔覺，淒厲就可能
成首歌伍樂城其實教到功課，黃仲凱寫到出色既歌詞
再一次將首歌毀於一旦既就係杜生既唱腔
死板，無感動力 (當然，唔排除佢已經盡左 120% 既能力)
所有既感動化為烏有，浪費

聽完頭兩首歌已經覺得佢唔適合唱歌

《值得愛》如果由黎明加應昌佑兩個唱，可能好高分
杜生今次呢？再次用一把大家去 Karaoke 嗌既聲音去演繹
首歌應有既美感無哂，情感又扭曲
唔係唱緊搞笑歌，又要用一把搞笑腔
究竟發生緊乜野事呢？

《眼睛想旅行》係全碟唯一一首有 point 可以讚既歌吧
Mark Lui 今次做得最好就係
用好嘈好熱鬧既編曲去襯托杜生把爛聲
最後就會覺得爛聲都無所謂，首歌唔係著重唱成點
係聽既人會 High 成點，甚至 High 到用自己把聲去蓋過杜生吧
或者隻歌又會變得再更美好一點

唯一上榜歌《開心到震》真係聽到成個人都跟住震
兩條麻甩佬一齊扮 cutie！
可以話林夕今年其中一首最可怕既作品
不過扮 cutie 呢個 point 已經足夠蓋過一切
首歌比 Sun Boyz 吧，無謂作賤大家既耳仔，太折墮了

第一次聽杜汶澤唱歌係一首電影主題曲，首歌叫《兄弟》(咁上下啦)
呢首歌當時覺得其實唱得幾唔錯，起碼係有心機
當然上一 d 論壇都有人主動去搵黎聽，聽完都會讚下
可能就係咁，促成左今次既機緣去出呢隻碟

最後，我誠意推介大快活廣告歌《阿尖》(唔知做乜隻碟唔落)
首歌同《眼睛想旅行》一樣，得個嘈字，但可以 High 到跳下舞癲下
如果呢隻碟我要打個分數，我會比 10 分
一來我相信有碟可以比呢隻更衰，所以留條後路
二來比番少少分《眼睛想旅行》吧
又如果要推介呢隻碟入面既歌
我會建議大家去唱 k 時點《眼睛想旅行》出黎自己唱，反正沒差

打完以上既字後
響某論壇見到一句：估唔到傻強隻碟仲好聽過 Janice 同 Jill...
所以我話呢，歌評碟評其實都係好個人既感受
我既感覺，我既評語其實只係適合我既耳仔
睇完評語，大家都應該自己去嘗試聽下
可能你同我會有共鳴之處，亦會有唔同體會之感