經期唔準

今日睇左個廿來歲既女病人。

攪肚痛同嘔左一日, 檢查冇乜特別, 只有腸胃炎果d郁得好快既bowel sound (嘰呢咕嚕 果d聲呢)

病人經期遲左十日。

好彩有同佢驗孕, 唔係就差d中計當左係腸胃炎黎醫。

我有個好習慣, 只要係有經期既女性, 只要有提到想嘔/有嘔, 經期未到, 每個我都一定建議要驗PT (pregnancy test)

我做政府果時, 經期遲兩日我都會話一定要驗PT; 病人通常冇乜所謂, 因為反正只需提供小便就得, 唔駛俾錢。

私家就好唔同。

驗孕係要錢既, 一般要加收$50-100, 視乎個別診所收費。

好多時病人入黎果時心入面根本冇"可能有左"呢樣野, 你突然話要驗小便, 就算解釋得好清楚都好, 半信半疑覺得你唔知係唔係想借d二收佢多d錢既人大有人在: 尤其常見於唔係好信你, 第一次睇既new case 病人。

如果你問我, 我覺得呢類病人仲有一個共通點 : 對自己既經期唔上心, 好似自己一定唔會懷孕咁。

你問佢平時經期準唔準時, 佢答你準; 奇就奇在你再問佢LMP(last menstrual peroid, 最後一次黎經)o係幾時, 佢都可以諗好耐都唔記得。經期唔準時果d呢, 你更加唔駛祈望問到個LMP出黎。

呢d對自己經期都一舊雲既女病人, 事實上正正就係避孕常識較差, 大左肚都唔知既一羣。

有d就算清楚知道自己經期遲左, 都唔知點解好有信心自己唔會有左咁, 完全唔會考慮自己check 下PT或者見醫生; 一路到有唔舒服見醫生, 醫生話要check先黎嚇大家一跳。(醫生都會嚇親ga...因為好多藥都唔可以開比大肚婆....)

其實好多女士都有做menstruation diary: 用記事本紀錄番自己幾時至幾時黎M, 流量係點咁。 除左可以更早發現自己有可能"有左"之外, 個pattern清清楚楚咁俾醫生睇到亦有助醫生診斷各類婦科病。

呢個世界冇百份百安全既避孕方法, 女士們應該對經期呢個生理現象"上心"多d, 如果唔係攪出人命都唔知呀!