網誌分類：music/work/friend |
公司都開咗好一段日子......
當初做商業登記,只係諗住方便做野,冇想過要發達,因為由細我已經知道自己唔適合做生意,總之有錢過手的工都唔適合做。
今個學年,終於叫做正式用公司名義接學校做了。
成間學校包來做,真係唔係想像中咁簡單。如果唔係以前做咗咁多年樂器班的行政,我估會做得更吃力。工作經驗,原來真係好緊要,因為你唔知幾時會用得著。
早兩星期開始,已經為著呢件事忙:去學校sell計劃,攪合約,找導師,做demo concert,出通告......好短時間要做好。好衰唔衰,呢個時候壞電腦同printer,攪到雞手鴨腳,最後忍唔住買咗部notebook用。
通告出咗,總算鬆一口氣,接下來就要睇到底有幾多人報,當然,呢樣野唔係我控制。
星期二(即係今日下午)係收通告的死線,唔知收成點呢?
今日收咗勁多家長查詢電話,突然覺得自己變咗,變得好商業,好PR。雖然我唔係藝術家,但都算係藝術工作者啦(我有創作架!),突然攪成咁,都唔知係好定唔好。
......
叫咗好多朋友幫手教,我依家只係有一個願意,我並唔係希望賺什麼大錢(當然都唔能虧蝕),只希望有錢大家賺,而唔希望因財失義/友誼,呢D例子我實在都見過下。
我希望我可以準時出糧,朋友們收人工時都覺得我唔係詭佢地咁就得了。
祝生意興隆!
