天祐我的愛人 ~ 溫泉篇

老公生日 , 遇啱 25 及 26 號係公眾假期 , 我一早已打算同老公去下旅行 !

初頭諗住去肇慶奧威斯溫泉酒店 , 後黎知道要熬好耐車 ,  我就打消左念頭 , 揀個近近地嘅地方玩 .

我地終於揀左中山古兜溫泉酒店兩天遊 , 兩個拍拍拖 , 溫泉溫泉 .

25 號 , 早上 8:00 要去到深圳集合 , 嘩 ! 真係人山人海 .

我地個導遊果朝早被人偷左部電話 ,  咁佢咪同司機無得聯絡囉 ! 咁佢就問團友有邊個有大陸卡 , 借部電話俾佢打俾司機 .  呢 D 咁嘅嘢 , 大黃一定義不容辭 .  點知個導遊攞左個電話之後 , 並唔係企係度同司機聯絡 , 而係行左去唔知邊樹 , 於是 D 團友就猛笑我老公個電話俾導遊攞左 .  唉 ! 幫左全團人仲要俾人笑 , 不過大家唔洗咁認真 , 大家玩下啫 ! 過左一陣個導遊就返左黎喇 , 我地就有車坐喇 !

去食晏 , 團餐當然無乜好食 , 不過 D 菜真係無得彈 .  間餐廳有樣好特別嘅嘢食 ~ 菠蘿包 . D 迷你菠蘿包入面有菠蘿肉架 ! 熱辣辣咁好好味 .

第一日整個上晝都係去 shopping , 聽產品介紹 !

第一站係國家健康科技產業基地 , 係介紹中藥材嘅 . 佢請左我地飲靈芝湯 , 又介紹左三七我地知 . 最後大黃買左 D 花旗蔘蜜糖夾心糖 . 佢話至啱佢同二少爺食喎 !

第二站係蘆薈養殖場 , 傍晚就去廣東橋樑博物館 .

D 相 ( 由左至右 ) 第一行就係蘆薈養殖場 , 入去除左睇下各種類嘅蘆薈之外 , 當然又要聽佢地 D 產品介紹啦 !  唉 ! 老公又話要買蘆薈牙膏同凝膠喎 ! 佢話牙膏大家都用得 , 凝膠就俾我同小黃搽眼袋同暗瘡喎 !

終於行晒 D 行程喇 ! 我地去到古兜溫泉 .

我地住別墅獨立屋 , 好正呀 !  我地同另一家人共 8 人 , 四間房 , 一幢獨立屋 . 房入面都幾乾淨 . 別墅地面果層係客廳 , 仲有低層 , 係麻雀房同廚房 . 除左張梳化比較邋遢之外 , 其他嘢都唔錯 . 我地住頂樓 , 都好舒服 .

食完晚飯 , 我地係溫泉酒店四周圍行下 , 成 10 : 00 先去浸溫泉 . 浸溫泉當然無帶相機啦 ! 咁夜已經無乜人 , 我地就可以甜蜜溫馨咁一齊浸下溫泉啦 !

浸完返房有嘢食呀 ! 有乜食 ? 話說個導遊話浸完溫泉可能會肚餓 . 於是建議我地買隻XX雞食 ( 唔記個名添 ) . 老公話出黎玩 , 乜都食下啦 !  於是就訂左一隻 . 你地睇佢幾靚 , 仲買埋啤酒 , 慶祝慶祝 ! 隻雞好滑 , 好好味 , 真係好介紹 .

第二朝一早起身就去浸溫泉 . 浸完就去食自助早餐 . 我地仲以為浸左先去 , 唔會咁多人 . 無錯呀 ! 真係無咁多人 , 不過就連嘢食都無埋呢 . 求其食左 D 就返房執嘢走喇 !

一早我地就去銀湖灣玩左一朝 .  先去食番石榴 , 本來我想買幾個返屋企 , 不過老公話費事拎喎 !  ( 哼 ! 佢買就得 , 我買就唔得 , 衰到屎 !  ) 

再去奇趣園睇 D 異品蔬果 , 真係好得意呀 ! 有興趣可以睇相簿 .

跟住坐船撈魚 , 唉 ! side 氣 ! 我地隻船只係撈到 3 條魚毛 .  仲係橋底食海鮮餐 . 橋底食飯 , 我都係第一次咋 ! 但係 ...... 典解無辣蟹食嘅 ?

跟住就去左水雲嶺 , 探下布依族 .  介紹嘅人員係 " 三嫂 " 佢講嘢好搞笑架 !  佢主力係賣茶葉嘅 . 老公知我平時係學校飲茶包 , 於是又話要買茶葉過我飲喎 !  最後 , 就係去蒙古族區 , 又聽佢地 sell 牛初乳片同馬奶茶粉 .  佢地唱蒙古歌 , 燒羊肉串 , 最後又係買嘢 , 老公又買左牛初乳片俾自己食 ( 補鈣 ) 又買馬奶茶粉俾我 , 等我暢順 D 喎 !

哈哈 ! 老公買左好多嘢 ! 其實好多都係話買俾我喎 ! 總之佢聽到話乜好物好就買俾我 , 不枉我咁錫佢 .

呢個溫泉之旅就咁完左喇 ! 真係超甜蜜 , 超開心呀 !