為好姊妹賀壽

終於寫完老公嘅生日活動 , 而家要寫番好姊妹嘅生日 .

23 / 10 係好姊妹小青蛙嘅生日 .

唔知點解 , 一識左小青蛙就同佢好投契 , 好快就成為好姊妹 .  舊年我只係係 blog 度同佢講生日快樂 ! 今年當然唔可以咁行貨喇 !

我一早就約左佢 24 / 10 去食生日飯 , 同佢慶生辰 .

跟住就密謀我一家同 Sister Lam 一家共 6 個人 , 送份禮物俾小青蛙 .

我靈光一閃 , 記起曾經學過製作影片 , 於是用僅餘嘅記憶 , 膽粗粗咁去製作左一段低 B 影片送俾小青蛙 .  我地 6 個人寫左各自嘅感受及祝賀嘅說話 , 真係夠晒誠意架 !

段片本來唔打算 post 出黎 , 因為實在太低 B , 但小青蛙唔介意 , 仲公開係 blog 同 facebook 度 post 左出黎 , 咁唯有叫各位有興趣就去睇下啦 !

http://hk.myblog.yahoo.com/MyKeroPlace-HaveFun/article?mid=23114

講起呢段影片 , 我真烏龍 . 本來諗住係 23 / 10 凌晨 12 : 00 就 send 俾佢同佢賀壽 .  點知我搞錯左日期 , 諗住係 23 / 10 半夜 12 : 00 send ( 即係 24 / 10 凌晨先 send )  , 仲點左小青蛙去睇呀 ! 真係唔好意思 !  好彩 23 / 10 晚同 Sister Lam 傾開偈 , 突然醒覺自己搞錯左 , 趕得切果晚 10 : 00 幾 send 到俾佢  . 好險呀 !

.....................................................................................................................................

係約小青蛙食飯時 , 我都好唔客氣咁問佢要乜禮物 , 後黎傾好買個生日蛋糕俾佢 . 但 ...... 我唔識整蛋糕喎 ! 就算識 , 佢咁鬼叻 , 都唔敢班門弄斧啦 !  好彩佢話想試魔鬼蛋糕咋 . 於是我就訂左個有佢個大名同青蛙樣嘅魔鬼蛋糕過佢囉 !

....................................................................................................................................

9 月已約好我 , Sister Lam 同小青蛙晚飯賀壽 .  後黎 blog 友咪嚤又想約我地 3 個食飯 , 於是咪整個 combine gathering 囉 !  無幾耐 , 亞比又私下約小青蛙食生日飯 , 小青蛙就提到我地 24 / 10 果個 " 犯罪 " , 於是亞比就搵我 , 問我可唔可以加入 , 結果 , 呢個變成一個 combine gathering X2 喇 !

我地約左係尚賓樓 " 打冰爐 " .

http://www.openrice.com/restaurant/sr2.htm?shopid=30314

其實又點止咁少嘢食吖 ! 不過 " 打冰爐 " 食嘅嘢都係咁上下 . 最值得一讚嘅係果度嘅手打丸子 ,  而小青蛙阿爸整嘅 XO醬 , 就真係好味到要一讚再讚呀 ! 樽醬係小青蛙專誠攞黎同我地分甘同味架 ! 真係多謝小青蛙同阿細伯喇 !

食到咁上下 , 就收爐食蛋糕喇 ! 仲交換下禮物添 ! 我就真係失禮喇 ! 無準備到禮物喎 ! 唉 ! 真係唔巧意思咯 !

我收到嘅禮物 ! 多謝咪嚤同亞比呀 !

最後 , 就梗係大合照啦 !

請大家留意下小青蛙果日送俾我地嘅大禮 ~ deep V 一大個 !

佢以為我地幾個阿太斯斯文文 , 客客氣氣咁 , 就以為好安全 .  殊不知 , 佢大 V 一出就誘發晒我地嘅獸性 , 當然就唔會放過逐一去 " 抽水 " 嘅機會啦 !

食飽飽 , 我地要交人喇 ! 一睇咪嚤就知佢係果 D 良家婦女黎架啦 , 唔夜得架 ! 咁我地就散喇 !