三年前的今天

三年前的今天. 你還記得嗎?2005年9月8日就係我同你結婚既日子..

仲記得當時我地結婚結得. .好急. 所有野都係臨結婚個幾日先攪. 仲好記得訂花球無花球. 化妝又唔合心意. 好多好多. 都好難忘. 幸好當時有媽媽既幫忙. 總算順利攪惦

終於都去到結婚當天了. 當日既我喊左好多次.. 第一次係. 仲係婚紗鋪哥哥黎車我去註冊處. 我擔心趕唔切而喊左出黎了. 第二次係當見到媽咪黎. 當佢同我講” 你係我個女黎架. 如果我今日唔黎你會點?” 大喊了.. 第三次. 我頂個攝影師竟然夠膽死遲到我頂. 註冊處既人又係咁催我入去. 點算呀~好彩. 老爺佢醒目扮去左廁所. 拖住先.. 第四次宣誓既一刻. 好彩只係眼濕濕者. 開心係因為能夠嫁比你. 有你既寵愛.

其實有時我都會諗, 你選擇娶我係因為你真係你所講既你好愛我好想一生一世同我一齊?衝動?任性?想玩下結婚?但, 我真係好想講, 由我第一日認識你既時候, 個種感覺就好似世界上只有我同你, 我好似搵左你好耐一樣, 有一種你就係我要搵既人一樣~

仍然好記得我地第一句既說話. 你叫我拎半打籃妹比你. 我答左你一句麻撚煩.. 仍然記得因咩事我地開始有野呢? 我整親隻手指. 你為我貼上膠布. 當晚就係睇緊我地既車路士.. 仲有一個好凍好凍既夜晚. 你比左你件褸我著.. 就係咁我地就開始傾下電話了. 仲記得傾到同我一齊做野既人都同我講句” 得啦~你同阿B傾啦. 我係出面攪惦就得了” 係埋一齊個日. 記得當日我剛剛係荃灣剪完頭髮約左你係尖沙咀食飯. 當日我選擇左搭地鐵. 而你同樣都係. 當你打比我問我係邊. 竟然我地係同一地方同一車廂由佐敦去緊尖沙咀. 但我真係唔知係車頭定車尾一出車廂當人群散去. 我地拎住電話對望著. 個種感覺. 好神奇. 好霖.. 杏花樓就係我地第一餐食飯既地方. 我仍然好記得你個日著咩衫. 食D咩. 飯後我地去左行海傍(好神奇呀. 我諗你都記得我曾經講過下呵. 識你之前我同CELIA講過. 如果而家有個人同我行海傍我一定會霖死架.) 就係咁我地就開始左了..

一開始從來無一個人睇好過. 仲記得媽咪叫你做外星人嗎?YOKO叫你做爆牙B嗎?IVY華哥走黎同我講阿B有咩好呀咁爛賭.JOEY話你個樣爭D.DEBBIE話你老牛. 但我通通都唔理. 因為我愛你.

新年~第一個係你屋企過既新年.超開心.因為經過呢個新年.我地就準備結婚了~

你估將軍澳同元朗近咩? 當時我返夜晚你返日頭. 為左要見多D. 你就成日飲野. 而我就逢星期六. 日係你到訓. 星期一開完會落鋪頭. 星期二一早起身落鋪頭望著你做野. 仲要就算我每晚收幾夜都好. 我每朝八點半一定會打電話比你叫你起身返工. 而家諗番轉頭都覺得自己好勁呀. 我咁懶訓. 都唔知我個陣點解會做得到. 哈哈

第一個我生日.感動得唔識講.呢個生日旦糕令我好難忘~

到終於都搬左出黎住了. 開心到爆呀. 真係要唔該媽媽呀. 無佢我相信真係搵唔到佢對面屋住囉. 大家好努力咁為呢間屋去出每分力. 裝修.佈置一個屬於我倆既家.

結婚了. 好開心. 好感動無諗過我地會咁快成為夫妻. 仲記得當結完婚當晚. 返到屋企. 於親戚面前我講左句” 阿B幫我拎罐可樂呀~” 你既答覆竟然係” 你係咪應該叫我做老公呢?” 當時既我老尷到呀. 咁人地咁大個女都未試過叫人做老公嘛. 怕醜架嘛. 哈哈.. 當晚返到我地屋企我只記得我地係咁老公老公老公.. 老婆老婆老婆.. 哈哈到第二日落到鋪頭仲白癡. 基基同阿TIM係咁叫我吳太我都唔識應添.. 好ON鳩仔呀~

第一個中秋節.超感動.謝謝你為我送上的兔仔燈龍~當中同你一齊渡過既每一個節日我都覺得好難忘.仍記得同你過第一個你生日.我真係好白癡仔.煮餐飯都要攪成個鐘.但我真係有好比心機去整旦糕同呢餐飯.因為我覺得就算我煮得幾難食都好.老公點都要食一餐老婆煮既飯.還記得白汁蝴蝶粉嗎?真係...好銀難食呀.謝謝你幫我食晒.

或許我們之前真係無咩相處啦. 當住埋一齊就發覺有好多問題出現了. 你爛賭我臭脾氣. 好個陣咪好到仆街囉. 但仆街個陣真係貼晒地. 而當時好多我身邊既朋友都以為我好幸福的. 識左你就唔駛再做. 但我只係選擇唔係我朋友面前呻. 唔想你肉酸. 唔再破壞你既形象. 但又如何呀. 老公係我自己選擇既. 再難行既路. 我都願意同你一齊行落去. 相處間. 最大既安慰係你帶給我既每一個家人. 同佢地一齊過每一個節日. 都係個句啦. 你問我鐘意去玩定留係屋企. 我鐘意一家人既感覺多好多好多....

或許個天真係要比好多好多既考驗我地. 當結左婚八個月個陣. 我發現我有左諾諾了. 當時我地根本無辦法得到一個共識. 我有我話一就一既性格. 我覺得唔係我大左肚要你娶我. 我覺得呢D叫責任. 而你就覺得生出黎我會捱得更辛苦係一世既事.. 就係咁. 我就一個人帶住諾諾走了. 當時我係好痛恨你的. 恨你不負責任. 我係你老婆而那個係你個仔. 無辦法你最愛的永遠都係自己. 那半年我地無任何聯絡. 係因為你同我講左句好難受既說話...

直至..2007年2月9日. 我發夢呀? 當日我竟然收到你既電話. 仍記得當見到來電個陣. 我面都青埋. 原來當日健康院見我咁耐唔去檢查擔心我有事. 搵唔到我打左比你. 閒談左陣. 我地約好左當晚出黎飲野. 再次一齊出現M1, 當晚每個見到我既人都好緊張咁同我講,” 阿B係入面呀. 唔好入去呀” 因為佢地怕我喊. 但當知道我係約左你. 佢地即講” 有咩咪兩公婆傾惦佢囉. 就係咁當晚我再次返左我倆既家了. 到而家仍然記得大家再次一齊坐住睇車路士既情形. 企鵝佢地每一句說話...... 直直式式一齊番係幾時?2月14日情人節當晚. 當晚我地一齊去番我地第一次睇戲既港威睇門徒. 去番第一次食飯既杏花樓食湯丸. 去番我地既海傍. 點樣一齊番? 你拖住我手講” 咁咪唔凍囉~” 仍然記得當過左幾日我地去行花市個陣. 我發脾氣. 你同我講” 我真係好愛你. 好想同你一齊~”

考驗. 點解又要有考驗?? 點解永遠幸福咁短暫? 當好好地既時候竟然又發生事. 點解咁鐘意賭? 但都係個句啦. 我永遠都好記得你從後擁抱著我叫我唔好走既情景. 仲好記得你曾經同我講” 我係男人黎架. 見到你捱你估我好受? 有時我都好想你同第二個一齊. 唔駛再跟著我. 但我真係好自私” 其實我從無諗過離開你. 因為我相信. 只要能夠同愛既人一齊. 無論條路再難行. 都會變得平坦. 有你陪住我. 我咩都唔怕..

慢慢. 我地既關系又開始變得好僵了. 唔識講呀. 好個陣真係好到爆. 糖癡豆咁. 衰個陣掟爛晒全屋既野都得. 吵吵鬧鬧. 我脾氣越黎越臭.你越黎越吊兒郎當.. 點解會咁呢. 咁難先可以一齊番. 但點解又要攪成咁. 真係所有問題係晒我到. 凡事做得太盡?? 同時亦有一個租務既問題. 咁好呀. 就比半年時間大家諗清楚啦. 分開下囉. 睇下大家改唔改到囉... 就係咁我就搬走了..

之後個半年既野我真係唔想再提了. 心水清既你地都知發生咩事. 我只知呢幾個月係我人生中過得最辛苦最痛的. 但. 點都好啦. 所有野都過去了. 而家係點呢. 個個都問我 而家咪比時間大家囉. 比時間大家去相信對方會改. 比時間大家真係知道咩叫” 珍惜” 咩叫” 愛”. 比時間大家建立信心.

我可以做的. 我可以講的. 就只係. 我由一開始我就已經無諗過要離開佢. 放棄佢. 我選擇得嫁比佢係因為我已經” 簡” 定左. 我從無後悔過認識佢. 更要答謝佢. 令我成長. 令我睇清自己既缺點. 仍然記得一開始個陣你同我講過跟住你粥都無得你食呀, 食粥水架乍, 所以好多野其實我真係一早預左, 我心甘情願的, 幸福並唔係用錢去衡量. 而係用心去感受...

老公~我愛你. 願我地可以一齊慶祝我地既結婚十週年. 二十週年. 五十週年. 直到老死. 一個女人嫁得比你並唔係講玩...

                                                                                                      愛你愛得很傻既傻婆

                                                                                                                05/09/08