湯寶如做開通潮母
湯寶如誕下愛兒陳俊滔（Keaton）後，已將全副精神放在家庭和兒子身上。曾在娛樂圈打滾的她，堅稱絕不會與時代脫節，要做一位「潮母」。她自認是一位思想開通的母親，就算兒子長大後對愛情或性充滿疑惑，她亦會灌輸正確的知識，認為「性」不是難以啟齒的。
曾是寶麗金三小花之一的湯寶如，於三十五歲時與未婚夫陳德民誕下麟兒Keaton，從前過慣娛圈多采多姿生活的她，現在變為賢妻良母相夫教子，湯寶如笑言這種轉變應付得來：「我平時又唔會蒲嘅，生活上大致無影響。只係喺我人生階段中多咗兩個重要嘅男性，我覺得我好幸福。」
不刻意安排路向
每個母親均望子成龍，湯寶如則着重兒子的身心發展：「佢長大後自己嘅生活會由佢自己選擇，我唔會刻意安排佢所有路向，但最重要係唔好學壞，做乜職業都好，過平凡、富裕生活也好，千祈唔可以傷天害理。」
曾任幼稚園老師，現仍修讀通識教育的湯寶如，在教導小朋友方面有一定經驗和學問。她說：「以前成日對住啲小朋友，唔多唔少對我湊仔好有幫助。」兒子雖然只得六個月，但湯寶如已明白為人父母的辛苦，她說：「佢依家開始識轉身，我就好擔心佢會焗親無人知。佢每晚都要飲夜奶，我就要喺熟睡中起身餵奶，依家我已經習慣咗，為人父母對仔女嘅照顧，真係無微不至。」
湯寶如在娛樂圈生活多年、雖為人母，但對社會動向和潮流觸覺仍十分留意，她自言誓不做「黃臉婆」，要做個「潮母」，她說：「雖然生咗小朋友，但絕對唔可以與時代脫節，唔想第日同個仔代溝太大。」自認是個思想開通的母親，深信為人父母者不可抱着守舊的思想：「好多母親會對個仔講大話，尤其是性問題方面。好多人會覺得性問題難以啟齒，但呢啲係人身體嘅一個部分，點解要去欺騙或隱瞞下一代，令佢哋將性變成禁忌。」
湯寶如做開通潮母兒子出生後，令湯寶如與家人和未婚夫感情大增，關係更加密切。
