抵食上海菜@霞飛

逢親年尾果幾個月公司就寧捨忙,見我Team 嘅同事捱咗一排,大家都真係辛苦喇,為咗慰勞佢地,一定要做番d嘢,一於請佢地出去食番餐!本來叫佢地Book 酒店Buffet,不過我個Assistant話自己又食得唔多嘢,唔係咁抵,所以佢地幾個決定Book咗K11果間霞飛食呢餐團年飯!真係知慳識儉!

馬蘭頭卷：用腐皮加入馬蘭頭去卷成嘅，細細粒好精美呀!而且清清地，唔怕肥膩!

素鵝：炸得好鬆脆，而且個面仲有ｄ類似蜜糖嘅物體，感覺好有光澤!

小籠包：新鮮熱辣，而且皮薄湯汁又夠多!

黃鱔炒飯：有辛辣嘅味道，如果食得辣就一定要叫，點解? 因為大家睇埋下面張相就知，佢除咗有黃鱔，仲有好多蝦仔，成個炒飯都好香!雖然我唔係好食得辣，不過都忍唔住食咗兩碗!

招牌擔擔麵：一般之作，唔係太突出!

糖醋排骨：骨頭較大，如果係食肉獸，可能有ｄ失望!

小黃魚：炸得都幾脆，如果同小南國相比，呢味就小南國好食ｄ!

南瓜餅：香濃南瓜味，甜甜地都唔錯!

高力杏汁蛋白：呢個真係幾掂，因為高力豆沙就食得多，裡面係蛋白同杏汁就真係第一次食，好好味!!

座位都幾鬆動嘅，不過要早ｄ訂位，因為價錢真係算幾抵，咁多樣嘢四個人食都係食咗四百幾蚊，原先我諗住去食Buffet，四百蚊一個人都唔得啦!佢地真係鍚住我個荷包喇!哈哈哈．．．．而且呢一餐仲幾好味添!