竊聽風雲 x 復仇 x 笑緊哥之變節 x 孤疑

過去呢2,3個星期睇左4套戲，3套同差人黑社會有關，1套驚慄片。

竊聽風雲好睇，學好多人話齋，古天樂做戲真係進步左好多，好多場戲都做得好好。劉青雲唔駛講架啦！型囉！最近睇幾套張靜初做既戲我都好留意佢，佢既演技真係好，好自然。我覺得呢套戲最慘係劉青雲囉，俾朋友拖落水，仲要死淨佢一個.....好多時死左既唔慘，唔死既先係最慘。

復仇係我第二套睇既杜琪峰電影(我估係，我一向唔留意導演)，其實唔算係唔好睇既，只係我覺得劇情有少少運吉啦，個鬼佬搵人幫手復仇，但自己最後連咩叫Revenge都唔知.......慘得過阿鬼佢地又鬼咁好記性，係都要幫佢報到仇為止喎！我估佢唔妥佢老細好耐....同埋呢套戲好"文雀"呀！人物都係果幾個，都係夜晚，都係落雨擔遮，仲有都係慢鏡........當然，係同一個導演就自然會有相同風格啦！套戲入面個鬼佬同佢地3個各影左一張寶麗萊，richey話佢超鍾意黃秋生果張，我就超鍾意林家棟果張，阿宏話︰咁我要林雪囉！哈哈....佢揀無可揀。

笑緊歌之變節就.....差左d喇。不過我都係鍾意黃秋生個一哥角色。事關我好鍾意佢著衫果d taste，好前衛，但又唔會覺得佢襯唔到喎！同埋佢地有d對白同有d場景都幾好笑既。有場戲講座頭要係咁爆笑緊哥樽，我唔知係技術問題定劇情需要，佢爆左四五個啤酒樽都好順利，但爆到一個可樂樽既時候就爆唔到，我見到一次爆唔到又爆一次，第二次爆唔到就第三次，第三次都爆唔到佢就發脾氣叫人幫佢爆左個樽佢.....果到我有笑出黎，d聲明顯係唔同，我估被爆既笑緊哥果幾下個樽唔爆都應該幾痛。仲有座頭叫笑緊哥同阿一講"no more make up，唔好化妝！"都好好笑。

最後係尋晚睇既孤疑Orphan.....我入左場開始緊先知係三級片.......即係爆血腥爆暴力驚嚇啦！可能因為我太細膽既關係(點解我咁生人唔生膽？)，所以其實我係由頭驚到落尾.....個細路女實在太好戲啦！所以令我覺得其實佢本身都係一個老人精。我覺得驚嚇在個女仔可以殺人唔眨眼，仲要威脅個可愛妹妹唔好爆秘密俾媽咪聽.....搞到個妹妹好慘呀....俾佢害都唔敢話俾媽咪知！最後個女仔個妝溶晒...我覺得超恐怖囉.....我一路睇就一路同細細聲講"我好驚呀...我好驚呀....."跟住小寶同我講"你唔好咁啦...人地笑你啦！"唉...笑都無辦法呀！我真係好驚。我第一次睇完套戲覺得個人唔舒服.....有少少腳軟既感覺。

後記︰我媽媽尋晚鬼咁配合劇情，我訓訓下教又未訓著果時無啦啦開左我房門爬上我張床，仲要係2次！！！！！！嚇到我唔敢訓....我驚佢會爬第三次...我諗我暫時唔會再睇呢d戲...我要回氣！！！！！！！