網誌分類：電影分享 |
今日睇左一套外語片，係英文、日文、韓文、國語同廣東話以外既語言，係德文戲....初初會覺得有少少怪，但睇落...咪又係睇字幕！
故事係講一九五幾年(唔知有無記錯...)既德國，當年阿爾卑斯山既北壁仲未俾人征服，好多爬山高手都好想征服佢，咁兩個男主角(德國人)就去征服佢啦(因為奧運...)！當時有好幾個國家既爬山高手已經去左果到紮營，視察適唔適合爬上去，不過最後都係覺得摶唔過，好多都撤退左，得返德國隊同奧地利隊上左山。德國隊係一個有好光月亮既夜晚上山，跟住奧地利隊都跟住上去(仲要用埋人地條路線！)，咁因為德國隊唔知架嘛...就dup釘落D石到啦，點知dup中一舊係唔夠堅固既石，就跌左落山喎，奧地利隊唔知架嘛....咁其中一個隊員俾D落石dup中左個頭，搞到狂流血...(抵！)跟住叫到好似"湯"豬咁！然後德國隊就知道左奧地利隊跟住佢地啦。本來另一個隊員都勸佢走既，但佢又死都要上去喎！咁就唯有上啦！咁德國隊既其中一個個性比較進取既男主角就技術叻D架喎，佢用自己將自己fing左去崖既轉角，成功咁搭左一條繩索，令穩重D既男主角可以爬過去，點知果個死人奧地利隊竟然厚面皮到問佢地可唔可以借繩索黎用....最後兩隊變成一隊......跟住穩重D既男主角就提議不如唔好拆條繩索，如果要返轉頭都叫有條路，但進取D既男主角就話一定無問題，所以堅持拆繩。俾石dup中頭果個人傷勢加劇，中下中下咁...就差錯腳跌落山，跟住推埋下面果個同伴落山，佢自己就整斷左一隻腳，咁就令德國隊被迫都要返轉頭...因為如果德國隊掉低佢地，佢地一定會死！點知原來要落山都唔係咁容易....3個人帶住一個大包袱落山，只可以落少少又吊佢落去咁...後來遇著雪崩，進取D既男主角俾果D"lum"落黎既雪同石打中左，成個人飛左落山，連帶個大包袱都飛埋落山，奧地利既同伴因為受唔住2個人既沖力，俾條繩一扯成個人就跳起左個頭砍左落座雪山到.....即死。穩重D既男主角因為知道雪崩，所以叫做有準備，及時扯得住飛落山既德國同伴同大包袱，後來德國同伴醒返，為左想穩重男主角可以平安咁返屋企，所以佢就割斷左自己同大包袱連住穩重男主角條繩，佢地就跌落山崖啦(套套雪山片都有呢個情節...)。得返一個人既穩重男主角企係一個只能俾佢原地轉圈咁大既石頭上面，等人黎救佢，後來真係有人嘗試去救佢，但因為風雪太大...就算係當地既救援人員都幫唔到佢。到左第日好天D，救援人員又再去救佢，點知救援人員帶去D繩唔夠長...(我好懷疑救援人員係咪有心救人)用左一條繩唔夠之後就用左另一條繩駁長左，但都係唔夠長！穩重男主角用自己最後既力氣游繩落到黎...發覺..咦？點解...會有個結既？爬山要黎扣住繩果個扣跟住就通過唔到果個結！果刻個情景實在係太無奈啦！！！個穩重男主角"抬起"頭望住個結....然後又放棄咁"垂低"個頭，果刻戲院好多人都笑左出黎，唔係唔同情，但真係好好笑，因為真係無奈到爆炸。最後係連穩重男主角都死埋架！
雖然呢套戲係咁多人死左，但係唯一一套戲我覺得唔會太心up，我都唔知點解...套戲唔會好似一般美國片咁有好多激動驚險境頭，但就好寫實，同埋D演員好做得出一九五幾年既feel，令我睇既時候唔會有種呢套係現代戲既感覺。睇戲既時候可能因為太入戲...所以我對手係凍到冰咁....仲緊張到出晒汗..哈哈！雖然我唔明爬山既人，但呢套戲好值得睇，可以的話應該入場睇的，不過全香港得五間戲院有，我諗上影日期都會好短....
