做證件 ~ 健康院

今日同樂樂去做回港證加回鄉證, 因為公公想樂樂新年番大陸, 一早就出發去火炭人民入境事務處, 真係好多人做證, 好在我地網上預約咗所以唔洗一早去攞籌, 去之前已經係網上check好哂要嘅文件, 點知去到都係帶漏咗婆婆嘅身份證副本, 要係果度影印, 要成$2一張, 食水真係深....... 又由於果度地方淺窄, 我地又大袋細袋加BB車, 真係好"呢hee", 張form又填錯, 比個文員串...... 不過最後都順利攞到證, 成個過程連取證都係用咗45分鐘 (收費$140, 五年期).

做完回港證就立即番大埔中旅社做回鄉證(要有回港證先可以做回鄉證), 又再一次比人收咗$2影印費(影回港證), 又係因為預約咗, 所以唔洗十分鐘就攪掂. 21號再番去攞證, 收費$460 (五年期, 做快證加多咗$200, 好肉赤)

之後去咗Jusco泵奶比樂樂食, 好白痴地唔知有育嬰室, 所以去咗廁所泵, 之後婆婆仲"mou"係地下餵樂樂, 餵到一半商場姐姐先話比我地知有育嬰室嘅存在, 超超超低能........

餵完奶就去健康院, 果時已經三點幾, 仲未食lunch, 但已經遲到(個appointment係兩點半), 雖然好肚餓都趕咗去先, 個文員姐姐好友善地"串"我地遲到咗成個鐘, 話個位已經比咗另一個BB, 當堂呆咗, 好在佢check到四點鐘仲有一個位, 問我地要唔要, 挭係要啦~ 我唔想第二日再嚟過....... 等等等, 最後我地係最係一個家庭離開健康院

兩個月記錄~

身高: 55.5 cm

體重: 5.37 kg (一個月: 3.85 kg)

頭圍: 38.4 cm (一個月: 36 cm)

本來屬中碼, 但身長屬小碼, 姑娘仲幫BB check腳仔關節, 一切正常