幾時先會好番?

前日去照X-Ray, 今日睇報告, 聽完醫生講解之後, 好無奈. X-Ray顯示我嘅頸椎冇骨折, 但由於周邊肌肉唔肯放鬆, 不停地抽緊, 所以連頸椎都一併拉緊, 由原本嘅S型抽緊至畢直, 所以頸部會覺得非常痛, 除咗食葯同物理治療, 都冇咩可以再做, 而且醫生話受傷嘅位置要好耐先可以復原, 所以估計我仲要休息一陣時間先可以番工, 一聽到哩度, 我個心立即冷咗一折, 仲要一段時間先會好, 即係幾時呀?

打電話番公司問有關工傷嘅事, 原來我要去勞工處判傷, 而且番工之前要去公司嘅指定醫生作評估, 確定我真係完全好番先可以番工, 哩d嘢一直都冇人話比我知, 我根本唔知道要做噤多嘢! 已經唔舒服, 仲要我周圍去, 日日都要出街噤制, 唔係去睇醫生就去做物理治療, 又要番公司同去勞工處, 我好想番工呀! 起碼我會覺得自在d先啦! 以前好唔想番工係因為好怕會遇到d麻煩客麻煩上司, 宜家日日係屋企無所事事, 一諗到仲有半年就續約, 就好擔心公司會唔續我約, 雖然話宜家個市好番好多, 不過我地哩行如果要出番去搵工真係唔容易, 一來人工冇噤好, 二來我地一個月起碼有十幾日假, 又唔洗日日晨噤早就要逼車番工, 如果要我番去做office工, 我可能好難適應. 越諗越驚.......

哩兩個月雖然公司都有出足糧比我, 但我地哩行, outport allowance係一項好好好重要嘅收入, 就因為我哩兩個月冇番工, 失去嘅allowance 為數不少, 單靠basis salary根本無法支付屋企嘅日常開支, 供數, 供保險, 水電煤雜費, 比家用........ 一浪接一浪推我去牆角, 細個果時唔知原來爸爸媽咪養我地三個化骨係噤辛苦, 宜家自己有一頭家先知道維繫一個家係有噤有學問噤多數要計, 我算術好差, 吳生又唔得閒哩, 佢仲要覺得根本冇問題, 係我害擔心, 男人係咪個個都一樣, 都可以天跌落黎當被蓋?

我宜家好努力係屋企做復康運動, 希望可以盡快好番, 日日噤痛, 一d都唔好受