打風之初體驗

做0左幾十年人, 當然唔係未試過打風啦.  不過打風而要當通宵更, 又真係第一次 ...

唔係刷鞋, "馬記" 一向將伙記0既福利睇得好重, 但係敝部門又無可避免要打住風0黎開工 (投注站唔開, 上網唔係個個識, 而外國冇打風, 球賽照舊, 即係照樣有得賭).  要搵人返0黎開工, 自然就要有好多配套安排, 好 care 同事之餘, 外人睇0黎可能會覺得不可思議, 由尋日講起 ...

一見到天文台有比較確實 "打到0黎" 0既時間, 當值經理就即刻要 call 會, 叫齊各大門派, 夾定幾時執行以下各項行動, 而家未定到0既幾時要決定等等.

人手 - 我地當然唔可以迫人 8 號風球繼續開工啦, 於是由 3 號風球開始, 我地就要 "吼" 實天文台0既一舉一動, 又要同巴士公司聯絡加車, 總之務求要響掛 8 號風球之前送走晒所有正常更同事.

同一時間, 我地又要搵 d 人 call 果班報0左名0既 "颱風敢死隊", 叫佢地響掛 8 號之前返0黎, 一來正更 d 同事陸續走, 佢地唔返0黎 "頂檔" 就會影響服務, 二來如果佢地到掛0左 8 號先返, 又驚佢地有危險 ...

當然, 要得同事返0黎就唔會虧待佢地.  肯響打風期間返工, 除0左原本0既鐘錢之外, 每 8 粒鐘另外有多 $100 津貼.  如果好似今晚咁, 係返半夜0既, 做過 1 點同 4 點仲有額外錢架 !

交通 - 勞工法例話要安排員工響颱風期間0既交通, 於是 "颱風更" 同事0既來回接駁巴士要免費.  又因為唔知幾點鐘會由 8 號落番 3 號風球, 落風球同事就有權要求走, 所以就要搵定幾架巴士, 成晚通宵響外面等.  同的士一樣, 架巴士擺響度唔開, 我地都係要俾錢架 !

膳食 - 冇得走, 梗係要有糧水啦, 於是要安排定杯麵、檸茶.  同事話以前淨係得麵太 "寡", 於是今次有埋零食; 同事話 "伊麵王" 唔好食, 下次可能要轉 "合味道"; 同事話飲得檸茶多 "削" 胃, 於是下次要搵埋維他奶 ... 仲要一路睇住夠唔夠貨捱到落風球, 否則要即 call supplier 補飛.

休息 - 有 d 同事可能由日頭踩到通宵, 咁梗係要抖抖啦.  我地每 4 粒鐘都會俾返 15-30 分鐘休息時間 (有糧出0架), 如果有人有需要瞓陣, 仲可以特別安排添 !  更細心0既, 係而家搵緊 d 酒店果隻牙刷+牙膏套裝、即棄毛巾, 同埋眼罩+耳塞套裝 ... 簡直係 "五星級的家" !

生意 - 老實講, 唔顧得咁多, 唯有落個錄音, 叫 d 客等等, 或者用自動系統 lor.

咁究竟成晚忙唔忙 ?  忙0架, 颱風更0既人手一定冇正常更咁齊, 而客仔冇少到 (甚至多0左), 所以聽 call 0既同事會忙.  Support 同事呢 ? 淨係安排放小息、派食物、睇實天文台、同埋聯絡巴士公司, 都已經有排玩啦 !  仲有好多計劃0既0野冇講啦 ...

辛唔辛苦 ?  睇你自己0既心態啦.  以我呢 d 咁鐘意試新0野0既人, 試0下無妨0既, 何況要做得晒時間過得幾快0架 !

而家 5:32am, 有咩願望 ?  除0左想快 d 收工之外, 亦想陣間搵間茶檔 (最好係舊式果隻), 飲杯茶, 整隻糯米雞 (咁阿伯0既 !?), 然後返屋企沖個涼, 再瞓一覺 ...