C'est Bon! French Cuisine

見到個標題大家唔知會唔會誤會我又去學整蛋糕呢！其實今次係想介紹一間好出名既法國餐廳俾大家

點解間餐廳又叫"C'est Bon"，其實可能鐘意食法國菜既朋友都知道"C'est Bon"一詞來自法文,解作「十分好」的意思,每當法國人品嘗到 一頓豐富的甜品,便會不其然說一聲"C'est Bon"。可以說,"C'est Bon"一詞,除了「十分好」以外,亦代表了對食品的讚賞。

C'est Bon法國餐廳的第一間店於2001年在曼谷市中心開業，憑着它獨特的佈置及美味的食物，曼谷C'est Bon 曾先後於2004及2005年被著名雜誌Talter選為泰國之最佳餐廳 而它著名的九道皇牌法國菜更被傳媒爭相報導。而更估唔到一間咁出名既法國餐廳的老闆居然係香港人

C'est Bon 的香港分店已於2005年6月在青衣城開業。 之後更喺九龍灣德福開第三間分店。

其實我之前己經聽過同事"阿愛"提過，成日都思思想去試吓，終於見今個月出咗"Back Paid"，所以就約埋Wing Wing去食餐好既而我地今次因為貪方便，所以揀咗去九龍灣德福嗰間分店。

入面既佈置真係好靚架，而且可能我地比較早到，所以仲未有好多人

我地因為都只係兩個人，所以無細心諗就揀咗佢地既皇牌套餐，一共有九道菜，都係盛惠$248咋，簡真超值呀。不過下次如果再嚟又多啲朋友既真係想試吓佢其他菜式，因為我之後見到隔離枱嗰啲菜式好吸引架

我地點咗菜之後，Waiter就攞咗啲麵包俾我地，我仲覺得好奇怪，因為我通常食意大利餐先會有特製麵包食，其他西餐都係跟湯既，但我同Wing Wing一於少理咪照食 到我地食完仲知道可以添加，但我地就，費時無胃口食其他野。後來我問我家姐(因為佢老闆係法國人)先知原來法國人鐘意將啲麵包點之後菜式啲醬汁來食，所以由頭到尾都會有麵包喺枱上，真係大鄉理

第一道菜 : 香煎法國煙鴨胸配香橙蜜糖汁

啲鴨胸肉質啱啱好，唔會好似其他餐廳乾淨淨，而且都都幾大塊架

第二道菜 : 我就揀咗焗釀蟹蓋配香草薄荷汁，WingWing就揀凱撒沙律

味道我就覺得一般，Wing Wing仲話個焗釀蟹蓋好似酒樓食既一樣

第三道菜 :香煎法國鵝肝配野莓汁

呢個菜真係要一讚，塊鵝肝煎得好香不特止，佢下面嗰個配菜減少咗鵝肝既油膩，成個菜好夾

第四道菜 :我唔飲龍蝦湯既，所以就揀香草蟹肉蕃茄湯，好清甜，至於個干邑龍蝦湯，我冇飲個，但Wing Wing就話OK，挭係啦佢係酒鬼嚟既

第五道菜 :西柚雪芭

食到中途，無端端嚟碟咁既野仲唔記得咗係咩嚟，只係見個個碟勁靚，食落先知係雪芭，好清香。後來知道原來法國餐都係咁既，目的係等你味覺神經可以Refresh吓，好有品味呀

第六道菜:蒜香橄欖油煙肉意粉

直覺覺得係因為驚唔飽所以有呢道菜既出現但千祈唔好睇少個咁簡單既意粉，我覺得好好味好過嗰啲加咗好多醬汁既意粉添呀！可能有啲野就係咁，簡簡單單反而就係最好既配搭

第七道菜: 炭燒澳洲羊仔鞍配露絲瑪利醬/香煎石班柳配番紅花汁/

炭燒牛柳配牛肝菌汁

由於我地都覺得煎石班好似普通咗啲，所以冇揀到。而我就揀羊仔鞍，出面餐廳呢個菜通常都有三塊既，但佢呢度雖然得一塊，但份量都唔差，因為真係成塊都係肉 唔似出面嗰啲有好多肥肉水準就更加唔駛講，一個字正。而Wing Wing個牛柳都唔錯，但挭係羊仔鞍好味啲啦

第八道菜:暖心朱古力蛋糕配雲呢拿雪糕/自選甜品

Wing Wing就要咗自選甜品 既白酒啫喱，你地千祈唔好睇幅以為好大件呀，其實個大細同一個Golf差唔多，但係個碟就係一個正常差唔多9吋既碟，都幾攪笑架而我個暖心朱古力蛋糕就好有水準但再值得留意既反而係雲呢拿雪糕下面嗰塊曲奇，好鬼脆相信可能係佢地自己焗添架

而第九道菜就係Coffee or Tea喇，所以相片欠奉其實呢間餐廳除咗食物之外，佢啲服務都好值得一讚。因為佢地毎一次都可以將我同Wing Wing揀既菜式放啱位置，雖然"阿愛"話佢地有辦法記低，但好多餐廳都無咁做架！所以我覺得好好呀