C'est Cake ** 〝迷你熱情果芒果半圓球〞

前日番夜，本來諗住朝早準時放工四個鐘頭就去C'est Cake學整〝迷你熱情果芒果半圓球〞蛋糕

點知天有不測之風雲 臨收工特然有野做攪到遲左成三個鐘，到朝早十一點先收工，之前諗住有時間順便d做激光矯視既資料俾以前既同事，所以仲約埋佢地食Lunch。

唉！所以我沖咗個涼就瞓都冇瞓就去咗尖沙咀食飯，好彩個〝天婦羅手打烏冬〞幾好味

食完飯我又即刻趕 去佐敦C'est Cake喇！

雖然咁辛苦但我真係一d都冇後悔，因為今次我覺得好多野學。

我整蛋糕雖然唔叻，但係我之前其實去過好多間Workshop度學整甜糕，呢間C'est Cake收費都唔算平，要成三百幾先學一款，但我就真係覺得一分錢一分貨。而且呢個價錢同好多Workshop差唔多但呢度位輝Sir就好似專業好多喇 佢教好多野都係其他師傅唔冇教架，佢會教你好多竅門令你整既蛋糕成功率大好多。

其實坦白講我初時覺得呢位輝Sir都幾吋架，而且佢講野講得好死快，但係慢慢就覺得佢只肯唔會造作你得就得，唔得佢絶對唔會因為你係客而俾面你 而且佢真係好肯教你野，只要你肯問。所以如果你係初哥既話，我就Suggest你可能要由基本學起會好啲。

今次學呢款餅有我最鐘意食既熱情果，都係因為咁我先試吓報咋其實呢個餅唔太難整 ，都係普通慕司蛋糕，但當中原來都有不少竅門可以令你既蛋糕綿上添花。

而我鐘意C'est Cake另一個原因就係佢毎一堂都會教你一啲裝飾技巧。我之前整啲蛋糕其實我覺得味道都Ok，但就因為我冇美感，所以睇落好普通，正所謂人靠衣裝嘛！而今堂既技巧就係學噴朱古力槍同整你地見到蛋糕上面嗰個朱古力圏圏。其實噴朱古力槍對我嚟講都係玩吓既啫，我都唔會特登買支番屋企既，因為好死貴架！但有得玩吓都好嘛

至於個〝朱古力圏圏〞就真係唔可以睇小喇！我覺得呢一Part先係呢堂最難既一Part。首先要學將朱古力調温，再將朱古力唧塊雪凍左既雲石上面，然後朱古力未變硬時就要造型，呢一Part其實最重要係要手快，如果唔夠快手就會變成一枝枝既朱古力條，造唔到圏圏架喇！就好似呢一個餅咁，我最後都係補飛將啲朱古力條砌個圏咋

呢d就係輝Sir 整既作品

我整啲雖然冇咁靚，但係都唔太失禮架

呢個係我整九個餅中我覺得係最靚既一個

至於個味道酸酸甜甜因為加左芒果，所以冇想像中咁酸，我覺得呢款餅最適宜作為夏日甜品