海泉灣篇 (第三集) – 多采多姿的海洋溫泉

Day 3 – Friday (6-4-2007)

珠海 > 海泉灣 > 海洋溫泉

今日check out之後，順便o係埋酒店間酒樓飲茶，食飽飽之後就坐的士去拱北，買車飛入海泉灣喇！我地買左135蚊既套票，係來回車票連神秘島入場卷。計起上黎係抵d！我地個時間剛好有車開，坐左大概一個鐘既車程，就到左海泉灣喇！今日天氣都幾凍！加上呢度近海，d強勁既海風吹埋黎。簡直令人打冷鎮。

海泉灣係香港中旅投資興建，開業只係兩年左右，海泉灣主要係由兩間酒店 - 天王星及海王星、海洋溫泉、漁人碼頭同神秘島組成。至於最大賣點就係海洋溫泉同埋神秘島。

因為假期既關係，check in都用左唔少時間，順利check in去睇下間房，有兩張大床同埋一張貴妃椅，出面仲有一個露台。厠所係活門既設計，浴缸側邊係一隻趟門，趟開果時可以睇到房間同露台。設計都幾開放式。hea完一輪就四圍逛下。

在漁人碼頭附近有幾間食肆，價錢與香港相若。我地o係面館食完tea之後，就行下漁人碼頭，旁邊有個表演台，會定時有節目，例如唱歌、雜技、舞蹈、遊戲等。

睇左一陣之後就o係碼頭度租d水上單車，o係個都幾大既湖度氾舟湖上，過程係勁凍同好攰。

玩完上黎都冇力喇。大家都好肚餓。就食dinner喇！去左一間西餐廳度食，係得我地一枱人，可以話係包場。個晚餐一般，但係餐廳可以欣賞到湖畔景色。算係咁啦！

o係便利店買啤酒零食，番上房之後再攞齊泳衣泳褲，向海洋溫泉進發。

我地呢個晚上時段係比較少人，所以唔洗迫。個溫泉範圍都幾大，分室內和室外。室內部分有桑拿、鹽水池、各種大小按摩池，室外部分就分了很多種類，講得出都有。日式、歐式、土耳其式的，又有各種性質既池，人參、靈芝、中藥、咖啡、紅酒等…千奇百怪。有一個池比較特別，就係兩個池連o係一齊，形成一個凹凸字，凸既一邊係40幾度既熱水，凹既一邊係10幾度既凍水。首先o係熱水浸到好熱頂唔順既時候，就即刻跳去凍水個池度。覺得凍既時候就跳番去熱水池。如此循環來回，一段時間後已不知甚麼是溫度了。雖然當時寒冷，但浸完呢個池之後會唔覺得凍架！

另外裡面有個玩意叫「親親溫泉魚」，18蚊15分鐘，o係個池度有好多魚，當你浸在水中靜止既時候，d魚就會向你「攻擊」，即係食你身上既死皮喇！初初既感覺真係好恐怖，但係習慣左既時候就幾舒服呢！

溫泉場內仲免費提供薑茶同鹽水，以補充浸溫泉其間失去左既水份。

玩到人地差唔多收工，我地就番房飲啤酒猜杖喇！