點解我會寫 blog？

    真係無諗過自己都會寫blog，因為以我的理解，blog就好似係一個網上日記咁，記低自己每日所發生嘅事，無論開心抑或唔開心的大大小小事情，都一一記錄，對於我呢個咁懶寫作嘅人，根本唔會做呢個動作。

    因為媽咪喺未離開我之前，佢係有喺Openrice度寫食評的習慣，佢話想將自己係醫好病之後，每次我陪佢去唔同地方食嘢的經歷記得，一來可以喺Openrice度同其他人交流食經，但最重要嘅係，佢喺醫病的一段日子是相當辛苦同唔開心，所以佢想將病後每次同我吃喝玩樂的時光記低，作為紀念。喺我一次重溫食評時，突然想到我都想將我每次煮過的菜式記低，留作紀念，因為有好多菜式都係喺我細個時媽咪煮過俾我食，又或者係媽咪曾經教過我點煮，所以我就諗起寫blog，記下我的"傑作"，一方面作為留念，做個記錄，另一方面就當係我送俾離開咗我嘅媽咪，多謝佢咁多年嚟對我嘅照顧、關心同支持！

    識得我耐嘅朋友都會知道，我同我媽咪感情非常之好，所以佢嘅離開對我打擊係非常非常之大，過去的一年，生活得好唔開心，一年後的今日，雖然對佢嘅離開仍未放得低，但心情總算好了點，所以就開始寫呢個blog。

    喺呢度我想同媽咪講句：請您放心，唔駛擔心我啦，如果您睇到呢個blog，您就知道我已經開始慢慢收拾心情，而且如您之前所講，我都識得煮飯煲湯，照顧自己，您唔駛掛心啦，我哋遲啲總會喺西方再見。