影婚紗相 - 後記

琴日影完相返嚟, 個人已經散哂.

其實琴日婚紗店安排得好好, 我地拍完外景都係5點幾, 返到婚紗店都係6點左右,相比另外幾隊外景, 我地係最早返到婚紗店.所以我地有比較多時間落妝同搞其他嘢.返到婚紗店後, 仲有茶點食.可能佢地知lunch大家一定唔會食好多, 一定會肚餓,而且仲有可能要留低補拍室內景.所以準備定D茶點俾我地打底.另外, 化妝師安安同助理小美真係好好人, 首先, 佢地知我冇穿耳洞,就刻意揀D夾耳仔嘅耳環俾我.仲有嘅係安安見我隻青蛙女公仔紥花甩甩地就趁lunch幫我用針線補返.真係唔該哂佢地.

不過, 我仲發現原來格仔餅唔鍾意返大陸嘅理由.

原因係..................廁所問題

其實我好明白佢嘅顧慮. 因為我都好怕响大陸要搵廁所, 因為D廁所嘅衛生情況真係幾嚇死人(為咗唔想嚇親大家, 唔詳細講啦, 自己意會同想像吓啦).所以琴日成日都唔敢飲水.事源係琴日朝早, 上到去婚紗店時, 未化妝換衫前我地先去定廁所.(格仔餅著禮服會好少少,但係我一換咗婚紗晚裝之後就唔方便去.如果真係要去就要除返套衫出嚟先去得.而我所揀嘅婚紗晚裝全部唔係拖尾就係入面有鋼紗, 所以唔除唔得.之後又要麻煩小美幫我著返套衫,所以為咗唔想麻煩人唯有忍一忍啦.)女廁就冇乜大問題呀, 但男廁就......據格仔餅講, 未入到去已經聞到一大陣廁所味(呢樣我知呀, 去locker拎嘢已經聞到),入面又濕又up.佢都唔敢入去辦大事.嗰時係朝早都已經係咁, 咁如果再晏D咪會..........所以佢寧願死忍都唔去.直到出到外景,去到仙湖換衫至去.

至於令我個人散哂嘅理由,一來係琴日朝好早起身,唔多夠訓.二來戴住對con,對眼唔舒服.因為我唔係成日戴con,今次就要戴足12個鐘.第三係去海灘時又要間水又要行石路, 著住套長身裙同拖鞋根本行唔到,仲要赤腳行上石灘影相, D石比較滑,結果成個人跌低, 好痛呀. 好在冇乜事.不過, 响海灘咁吹風就搞到我感冒啦, 食咗藥成個人超攰, 唔講啦, 我要ZzzzzZzzzz啦.