2008新的一年

因為懶(天氣天冷呀!), 2008過左兩日, 先寫呢篇

2007年年頭寫過以下呢篇:

**********************************************

上年口中既新一年就咁就過左, 今年..........

1) 無啦啦由原本一個人住, 變左兩個人住, 又無啦啦又兩個住, 變返1.5個人住; 一年搬左3次屋, 又無啦啦係冰天雪地既地方多左一個都唔知自己有無份既屋企.............

2) 今年繼續都玩, 不過戒左weekdays出去玩, 起碼心理上都健康左(自我安慰), 間唔中weekends仲可以唔出街添, 我唔係收心養性, 只不過係年紀大, 再afford唔到玩到甩look既生活, 唉.....青春.........

3) 今年少玩左船河, 所以無哂到黑哂, 呵呵, 真開心; 今年反而去左好多次旅行, 去左日本, 去左上海, 去左澳門, 仲去左好多次唔係咁想去既北京.............明明最怕搭飛機, 偏偏一次又一次仲要自己一個人搭..嗚

4) 好開心一班朋友依然一樣咁開心, 咁癲, 雖然平日個個分開"搵食", 不過大時大節生日喜慶都聚埋一齊, 一齊.....醉, 卡卡, 好老土但好想講, 希望友誼萬歲

5) 又係工作, 今年潭死水好左少少, 終於調返出市區返中環, 唔駛日日係大埔務農, 至少係一件好事; 之不過當你想的起心肝比心機做野既時候, 可以懶左太耐, 我有d力不從心...我唔希望事業上有咩大進展, 不求有功, 但求無過, 阿門

6) 感情...............................

********************************************

2007年做過以下既事:

1) 搬屋: 是滴, 又搬。係"豆腐潤"咁細既屋度住左一年之後, 終於頂唔順, 有人良心發現, 建議不如搬返大d, 空間大d唔駛你眼望我眼, 返屋企唔駛日日"凌波微步"跳過放滿一屋既一地既雜物, 我諗, 我地感情可以好返d。搬上一條街, 大左又多左個天台, 閒時可以請朋友返黎house party (不過真係要好熟既朋友先得, 第二日執餐死, 人都癲)

2) 讀書: 詳見這裡。畢左業咁多年(1年), 一直都想再讀書, 今年終於係火燒屁股既進度之下完成報學校, 考GMAT, interview。扮上進既懶人呢個名並唔係浪得虛名, 至少我學校就係比我呢個扮上進既樣呃左收左我, 呵呵呵呵呵~ 於是係9月開始好努力玩, 唔係咁努力讀書既part time學生生涯。

3) 旅行: 呢一年去旅行去都痴左線, 先有2月既關島之旅, 再黎4月既京阪春櫻, 然後係人人喊打既東京行, 再黎6月份既北海道家庭樂, 年尾11月仲黎個巴里之行, 都未計久唔久一次既北京探親, 我估呢d真係叫做驛馬星動, 人地唔知仲以為我真係幾百萬未開頭(我係幾百蚊未開頭, 日日都係)。

4) 玩樂: 好老實講, 同一班朋友呢一年真係見少左, 一來好多時weekend一係就係北京, 一係就要陪太子飲酒, 唔再好似以前咁個個星期準時簽到, 二來又多左返學果批朋友, 三來年紀開始老(唉~), 一星期出一次街都已經夠哂皮, 出兩晚差唔多比埋條命出黎咁, 不復當年勇矣(呢個真係主因)。另外, 學識左潛水(真係潛落水果隻, 唔係收埋係屋企唔出街果d), 海底世界, 真係奇妙過迪士尼1000倍。 

5) 工作: 死水依然, 又轉左office, 對我黎講已經無咩分別, 反正都會走, 差左畢業前定畢業後走0者, 望就望08年個市繼續好, 轉工都易d

6) 感情: 有開心有唔開心, 有笑過有喊過, 有感動過又有心痛過, 有好多唔忿氣, 又有好多安慰, 有好多心滿意足又好多不滿, Anyways, we are even. 至少, 呢家每一日都係一個新紀錄, 好多人跌哂眼睛, 包括我自己

2008年, 好老土一句: there we are, here i come