北海道家庭樂 - 小樽壽司街 & 大和家壽司

係, 無錯, 又係食(綿先生話次次打親比我, 我地都係食緊野, 或者準備去食野)

當然啦, 我老豆係屋企有個花名, 叫蝗蟲首領, 留意唔係普通一隻蝗蟲, 係首領。大家都知蝗蟲係點嫁啦, 所到之處, 所有食得既野都會無哂, 我老豆叫得首領, 可想而知(我地呢D咩為食兵團, 唔該借借!)

言歸正傳, 係堺町滿載而歸之後, 我地就向將太的壽司果條壽司街覓食去。事前得"大會指定導遊"玻璃朱指點, 叫我地除左政壽司千祈唔好去之外間間都無咩所謂, 就隨隨便便揀左呢間大和家。

↑壽司吧檯前的師傅們

↑餐具擺設(快D啦, 我好期待)

↑先黎個螺刺身


↑何光明食到要再ENCORE既牡丹蝦

↑左口魚(佢地竟然無左口魚邊)


↑大拖羅壽司(何光明食左落口之後既形容係: E? 我舊拖羅呢? 即係入口即刻溶哂喎) 

↑連師傅都大力推介既小樽海膽壽司(好美味呀! 超甜, 羸左築地果D!)


↑令我地好驚喜既燒海鰻壽司, 真係炭燒嫁!

↑蛋壽司, 好味!

我地仲有食左帶子刺身, 不過太好食, 食完先記得無影相, 何光明既形容係: 好似食緊粒糖咁, 可想而知有幾甜

呢一餐, 唔單止滿足左壽司精何光明要一嘗日本地道壽司既願望, 仲令老豆對海膽改哂觀, 佢話以前好唔仲意食海膽, 覺得又腥又臭, 佢話估唔到日本D海膽可以咁好食, 又甜又鮮又爽。見你地食得咁開心, 我都好開心任務完成。之不過你地返到香港, 將會經歷好一段見到日本野都唔想食既黑暗時期, 尤其係壽司刺身, 將會見到都唔想放入口, 曾經滄海難為水呀~

p.s.
呀!係~見我夠膽坐壽司吧, 又叫到咁多唔同既野食, 千祈唔好以為我真係識日文好叻。日文唔係唔識, 但係程度大約同個幼稚園學生差唔多, 之所以識叫野食, 全靠玻璃朱同ANDREW生事前教定我, 我對住張貓紙讀咋(張貓紙既重要到我要夾係自己本PASSPORT入面, 呵呵), 同大家分享下(d英文字係近日文拚音既讀法):

池魚 a-gi (呀g)
深海池魚 shi-ma-a-gi
左口魚 he-la-me(嘻啦咩)
左口魚邊(好食!) he-la-me an-ga-wa
金目立 kim-me-dai
鮑魚 a-wa-be
螺 gi-bu-guy (好似正仆街~哈哈)
針魚 sa-yo-li
蜆 a-sa-li
蜆仔 shi-shi-mi a-sa-li
牡丹蝦 bor-dan-e-bi
鰻魚 u-la-kei
海鰻 a-la-gor
甜蛋 ta-ma-gor
蟹子 e-gu-la (好似問價錢果句日文, 個師傅教我的)
龍蝦 (唔識讀, 不過可以寫漢字"伊勢海老", 佢地會明)

如果要問師傅有無果樣野食, 例如有無牡丹蝦, 就可以問: bor-dan-e-bi, a-li-mas-ka? 你應該可以由師傅既身體語言知道有定無

如果唔係好知有咩好食, 要師傅介紹呢, 就可以問 o-shu-shu-mei, 佢地就會知道你想要介紹嫁喇

仲有仲有, 其實唔識日文, 最好就坐壽司吧, 事關可以見到咩想食就指丫嘛, 呢個真係最有效既國際語言, 哈哈!