中環OL生活

 好明顯，精彩場面實在乏善可陳，甚至每日嘅工作都悶到抽筋。

不過小蓮想唔係想喺度吐苦水，因為食得鹹魚抵得渴，做人做事，決定咗就要承擔責任。

小蓮想講嘅係，百無聊賴嘅生活，的確會滋養出無聊嘅人。

moliuologic第一課，非常靈異，叫「請神上身」。

呢個「神」，跨越所有國藉，所有宗教，令世人又敬又畏。不過因為語言同文化上嘅差異，每個國家對呢個「神」都會唔同嘅稱呼。

而喺香港，普遍被認受嘅聖名，叫「維園阿伯」。

請「阿伯」上身得到嘅護體神功，包括「事事都嘮叨」同「睇咩都眼火爆」。

再高階啲甚至可以出口成詩，內容之抵死啜核，聲樂和諧，對人體可以做成好大傷害。

內傷嘅有「笑到嘔」，外傷嘅有「笑爆肚」，抵抗力低啲，仲有可能「噴血」同「笑到想死」。

搞到自盡咁大件事，可想而知「阿伯」威力有幾強。

小蓮初練神功，請「神」上身之後， 其實都只不過可以挑剔下啲雞毛，冇咩火力。

最新發功目標，係資本主義劃於中環心臟地帶嘅刀疤 - 登山天橋。

中環地勢陡峭，條條路都係長命斜，有條登山天橋，做福大眾，是為德政！

之但係，光天化日之下，成條天橋偏偏散發住陣陣詭異氣氛。

話說天橋興建至今己多個年頭，收集天地之靈氣後，似乎已經通曉某些人性。

比人工智能更強嘅分析能力，天橋精第一樣學識嘅，係點樣揀人服務。

朝早人人返工向上行，自動走廊偏偏向落走，收工趕住走人，電梯就沿沿不絕將趕住返屋企同趕住去蒲嘅人送番上半山。

良禽擇木而居，天橋精區區道行已經可以漠視實際情況為半山居民服務，前途實在無可限量！