唔高興

之前有個同我老公好熟既鄰居, 借左我支閃光燈去玩(佢上到我地屋企, 自己打開我個防潮櫃拎走), 到我而家想要番來賣(因為我決定賣晒d攝影器材, 大件嘢唔啱我用, 太重), 已經擺左上網, $1200都有人要買, 於是問那個鄰居拎番.

我同佢講, 佢就不停踩我支閃, 話咩出到老遠交收人地見有花又會壓我價, 不如平d賣俾佢算. 我問佢想幾錢買, 佢又唔講. 我話平俾佢八舊, 佢又話要照顧下佢呢d窮人. 我唔鬼彩佢, 叫佢俾番我先, 如果$1200人地唔要, 我先平d賣俾佢. 佢之後先和盤托出, 話其實自己跌爛左我支閃, 有塊格仔片收唔番入去.

聽完真係"慶"過火屎, 你整爛左人地既嘢, 一路都唔出聲, 要人地開口問下落之後, 佢仲要狂踩我支閃, 彈到一文不值諗住壓低d個價先賠, 無嘢呀, 喺度逃避責任咁鬼childish架? 於是我叫佢賠八舊, 我老公仲話我蠢, 你賣到1200咪叫佢賠1200囉, 做乜要平俾佢. 我同老公講算啦, 以後唔會借嘢俾佢. 老公話佢轉頭又msn我老公, 叫佢幫手去觀塘拎平模型(因有個朋友做代理), 我老公唔鬼彩佢. 呢個人, 淨係有求於你先會出現, 幫完佢就拍拍籮友即閃, 認真無義氣.

我以後在佢面前唔會做好人, 所有佢有興趣既嘢會鎖好佢.