港式婚宴

今年係結婚好年，大大話話都去左十幾個婚宴。好多人話去到厭，去到悶，我就幾鍾意，因為可以同人地分享喜悅之餘，亦可以比即將會派紅色炸彈的我，偷偷師!!

歸納咁多個婚宴的觀察，婚宴好玩定奄悶、感動定肉麻、高雅定低浴，除左對新人的表現之外，亦好睇MC同兄弟姊妹的表現!!

如果搵著一對唔識講野的MC，就真係慘。見過有D MC，在台上講野時似背書，口震震，流哂汗，交波又交得唔自然，仲緊張過對新人，睇見佢都覺得可憐!! 明知係咁，當初點解要應承做MC呢?!

MC多野講過頭，又大鑊。多野講，自然就口沒遮攔，有時甚至問到對新人口啞啞，唔知點答佢地的問題。多野講，又自然多爛gag，講完只有自己識笑，全場人只有兩、三聲比面的乾笑，場面更尷尬。

有D MC，唔知係咪明玩野，係都鍾意問：「今日新娘子靚唔靚呀？」、「今日新郎型唔型呀？」、「個MV感唔感動呀？」對新人真係好靚同好型就話o者，否則呢類問題，往往只會又換來零星的掌聲同反應，自己尷尬之餘，新人更加想搵窿捐。

去過有D婚宴，有D兄弟姊妹可能不甘寂寞，新人都未醉，就先貫灌醉自己，周圍搵人隊酒，搞到自己面紅紅，瘟瘟燉燉，有時仲隊埋對新人。因為隊酒隊到大動肝火，繼而動武的新聞，報紙時常都會見到，有D兄弟甚至隊到個新郎或比人隊到中酒毒瓜老襯，為乜？！

其實結婚同飲酒，有乜關係？隊lum左人，開心D咩？代表你叻D咩？我就唔會同你用個肝來教飛囉！！

其實幾唔明，由幾時開始，婚宴需要播成長片段。不過其實都好，可以比一D唔係好熟的朋友，睇下自己以前個樣，以及同另一半的愛情史，都OK。但成長片段不宜太長囉！一首歌的時間，其實已經係幾夠，再多，就會睇到悶。

而成長片段的相，應貴精不貴多，必要既係兒時裸照、著住泳褲谷大隻照、戴黑邊粗框眼鏡呆佬照，目的係用自己的醜態，換來「嘩、嘩」連聲，令人發笑，呢個我接受。但有一次睇一個成十五分鐘的成長片段，D相又多，仲大部份係普通過普通的生活照，冇乜得意相，真係悶到差D訓著左。

另外，近年去的婚宴，玩新人的項目少了，甚至冇。其實玩少少係可以接受，不過唔好太多太淫賤就得。反而我幾鍾意抽現金環節，有得食有得ling，唔錯！！

婚宴上，少不免會播下早上接新娘的情況。講真，娶老婆係一件開心事，但新郎在接新娘時，卻總係被玩的一方，唔明點解，唔係話男女平等咩？點解唔玩下新娘？其實呢，點解一定要玩？！玩都算了，呢個係傳統，但玩得過火，就令人反感。

有一次做兄弟，姊妹竟然要我地食一些昆蟲，我成世人都未食過昆蟲，竟然在呢個場合要我獻出我寶貴的第一次，真係想反面！！

又見過有D姊妹，用香蕉溝朱古力扮屎，放在尿片上要新郎食，真係核突之中的核突，極盡侮辱！第一個諗出來果個固然變態，之後跟住玩果D，唔該用下腦先啦，尿片本身你估好衛生？佢既衛生程度，可以防止BB仔爛屎忽，但唔代表衛生到放落口都冇事！！萬一果塊係內地劣質尿片，用醫院的廢棄愛滋病棉花所造，食死左個新郎，你班蠢人擔唔擔當得起？！娶老婆娶到要食屎，真係騎呢透頂。

除左食蟲食屎，有時仲要食wasabi、飲辣漿溝豉油，即使食唔死，卻痾到七彩，下午仲點行禮？夜晚仲點擺酒？

仲有呀，要新郎讀愛的宣言，唔該用下腦自己作，唔好在網上download啦。什麼「成副身家比哂你，我D零用由你俾．．．」聽過幾十萬次，好悶呀！！要我讀D咁冇新意既野，我寧願自己作一篇來讀好過！！

最後，婚宴最緊的就係，唔該早D開席啦！！次次成九點半先有得食，餓死人咩！！！

明年到我結婚，今日寫咁多不滿的東西，唔代表在我的婚宴中唔會見到，到時我的婚宴如果犯哂以上的問題，悶到爆，請唔好介意，因為我始終係一個傳統平凡的香港人，搞的係一個傳統平凡的－－港式婚宴！！